Takim Konsultues “Hartimi i letrave të pozicionit për zhvillim të kapaciteteve në sektorin e furnizimit me ujë dhe kanalizimeve në Shqipëri”

SHUKALB organizoi një takim konsultues online më 18 Shkurt 2021, me objektiv të përgjithshëm për të diskutuar dhe vendosur një qasje të përbashkët mes palëve, mbi dy tema avokimi për Institucionet Ndërkombëtare të Financimit (IFI) dhe Donatorët: (1) Integrimi më i mirë i projekteve të investimit kapital dhe masave për zhvillimin e kapaciteteve të shoqërive UK me programet ekzistuese të trajnimit dhe të zhvillimit të kapaciteteve të ofruar nga SHUKALB; dhe (2) Mbështetja për përdorimin e produkteve të menaxhimit të aseteve dhe financim për zhvillimin e kapaciteteve për menaxhimin e aseteve të Njësive të Qeverisjes Vendore (NJQV) dhe ShaUK-ve, në kuadër të Projektit Rrjeti Rajonal i Zhvillimit të Kapaciteteve për Furnizimin me Ujë dhe Kanalizimet (RCDN).

Takimi ishte i suksesshëm në mbledhjen e reagimeve dhe identifikimin e elementeve të rëndësishëm për t’u përfshirë në hartimin e letrave të pozicionit. Në takim morën pjesë 15 përfaqësues nga Shoqëritë UK anëtare të SHUKALB, Shoqata e Bashkive të Shqipërisë, Shoqata për Autonomi Vendore, GIZ-Programi Bilateral i Ujit, Enti Rregullator i Ujit dhe RCDN.  Takimi u moderua nga Mihallaq Qirjo, Drejtor, Qendra Burimore e Mjedisit – Shqipëri.

Moderatori prezantoi një përmbledhje të temave të advokimit dhe lehtësoi një diskutim interaktiv midis pjesëmarrësve rreth çështjeve dhe nevojave të sektorit drejt temave specifike. Në vazhdim, pjesëmarrësit u ftuan të jepnin reagime në procesin e hartimit të letrave të pozicionit, si dhe të marrin pjesë në takimin përfundimtar të palëve të interesit që do të organizohet në Mars për të diskutuar më tej mbi letrat finale të pozicionit.