Investimet e reja të Ujësjellës Kanalizime Kamëz premtojnë përmirësim të konsiderueshëm të shërbimeve për qytetarët e Kamzës

Bashkëpunimi i Ujësjellës Kanalizime Kamëz Sh.a (UK Kamëz), Bashkisë Kamëz dhe Bankës Gjermane të Zhvillimit (KFW), po sjell një seri investimesh të mëdha që synojnë të përmirësojnë ndjeshëm cilësinë e shërbimeve të furnizimit me ujë dhe kanalizimeve për banorët e Kamzës. Aktualisht, UK Kamëz është në fazën e katërt të zbatimit të këtyre investimeve, të cilat përfshijnë sa vijon:

• Ndërtimi i Godinës së re Administrative për UK Kamëz
• Rehabilitimi i Burimit të Bovillës së Vjetër
• Instalimi i sistemit SCADA
• Shtrirja e rrjetit të furnzimit me ujë
• Rehabilitimi i Puseve

Godina administrative është një investim tashmë i përfunduar dhe do të jetë një ndërtesë multifunksionale. Për çdo institucion është e domosdoshmë të identifikohet me një ndërtesë të sajën çka sjell rritje të performancës së punonjësve dhe përmirësim të shërbimit ndaj konsumatorit.

Projekte në zbatim:

• Shtrirja e rrjetit të furnizimit me ujë

Ky projekt shihet i domosdoshën të zbatohet për shkak të amortizimit të rrjetit ekzistues çka do të sjellë përmirësim të ndjeshëm në furnizimin me ujë në zonën e Bathores. Ky rrjet do të ketë një gjatësi prej 64.9 km linja ujësjellësi, 17.2 km tuba për lidhje konsumatorësh por mbetet për t’u përmendur që do të shtohen si konsumatorë edhe 4,200 abonentë të rinj.

Pjesë e këtij investimi është dhe rehabilitimi i Puseve të Valiasit. Bazuar në studimet e bëra si dhe nevojave të territorit të Bashkisë Kamëz për furnizimin e rrjetit u pa e domosdoshme që përpos dy puseve ekzistuese të investohej edhe në dy të tjerë.  Sipas edhe funksionimit inxhinierik këto puse do vendosen në punë në mënyrë të alternuar gjë që do shmangë avaritë e mundshme.

• Instalimi i sistemit SCADA

Pajisjet/Rakorderitë e matjes, regjistrimit dhe transmetimit të të dhënave do të instalohen në të gjitha stacionet e pompimit, rezervuarët dhe në rrjetin e shpërndarjes së ujit. Të gjitha sinjalet do të bashkohen në një sistem gjithëpërfshirës SCADA që mbulon sistemin e furnizimit me ujë të qytetit të Kamzës.

Përdorimi i këtyre pajisjeve për të mbledhur informacion do të përmirësojnë kontrollin operacional të të gjithë sistemit të shpërndarjes së ujit (burimet, stacionet e pompimit, rezervuarët, zonat e rrjetit të shpërndarjes).

Sistemi SCADA për UK Kamëz siguron integrimin dhe lidhjen e:
– Burimit të vjetër të Bovillës

– Rezervuarit Maloku

– Rezervuarit Hoxhaj

– Puseve Valias

– Leximet e matësave (EFM) në rrjetin e shpërndarjes

– Qendrën e kontrollit në godinën e re të administratës së UK Kamëz.

• Klorinimi automatik

Në mënyrë që të përmirësohet metoda ekzistuese e dezinfektimit, është ndërtuar një ndërtesë e re klorinimi në burimin e Bovillës me metodën e injektimit direkt në tubacion të klorit në varësi të prurjeve në tubacion me anë të një sistemi automatik të monitorueshëm në çdo kohë. E njëjta procedurë do të zbatohet edhe në puset e Valiasit, ku në pusin nr. 4 do të ndërtohet i njëjti sistem klorinimi si në Bovillë.