SHUKALB zhvillon vizita dhe trajnime në Shoqëritë UK në kuadër të programit “Plani i Sigurisë së Ujit dhe Menaxhimi i Krizave”

Gjatë periudhës qershor-korrik 2021, SHUKALB zhvilloi 3 sesione vizitash në terren dhe trajnime në Shoqëritë ujësjellës kanalizime Belsh, Gramsh, Berat-Kuçovë, Lushnjë dhe Patos, në kuadër të zbatimit të programit të D-LeaP Plani i Sigurisë së Ujit dhe Menaxhimi i Krizave (PSU & MK). Programi PSU & MK zbatohet nga SHUKALB në kuadër të Projektit Rrjeti Rajonal për Zhvillimin e Kapaciteteve (RCDN*). Ky aktivitet është vazhdim i punës së mëparshme të nisur nga SHUKALB në fillim të këtij viti, me një grup më të madh shoqërish ujësjellës kanalizime, të mbështetur nga GIZ “Fondi i Hapur Rajonal për Evropën Juglindore – Modernizimi i Shërbimeve Komunale (ORF MMS), me qëllim sigurimin e mbështetjes për Bashkitë dhe Shoqëritë UK në Menaxhimin e Krizës Covid-19 në Shqipëri.

Ekipi i SHUKALB ishte i përbërë nga trajnerja kryesore Migena Kukli, bashkë trajner Elton Hasanaj, si dhe Drejtoresha Ekzekutive Elisabeta Poçi.

Qëllimi i vizitës së parë, organizuar përgjatë 7-11 qershor 2021, ishte të punohej me stafin përkatës të shoqërive UK në identifikimin e risqeve për elementë të veçantë të sistemit të tyre të furnizimit me ujë, duke përshkruar sistemin. Gjatë këtij ushtrimi, me ndihmën e trajnerëve, pjesëmarrësit ishin në gjendje të hartonin elementët kryesorë të sistemit të furnizimit me ujë në Google Earth. Si pjesë e kësaj vizite, pjesëmarrësit ishin gjithashtu në gjendje të diskutonin dhe identifikonin pozicionet brenda shoqërisë së tyre, të cilëve do t’u caktoheshin përgjegjësitë kryesore si pjesë e ekipit të menaxhimit të krizës.

Vizita e dytë u organizua gjatë 15-19 qershor 2021 dhe qëllimi i saj ishte të prezantonte pjesëmarrësit me rolet në menaxhimin e krizave përmes rasteve të studimit dhe të thellonte njohuritë e tyre në analizën e riskut bazuar në risqe të ndryshme të mundshme të identifikuara për secilin sistem të furnizimit me ujë të shoqërive pjesëmarrëse. Si pjesë e kësaj vizite, pjesëmarrësit patën mundësinë të vazhdonin punën në excel për analizën e riskut, të ndihmuar nga trajnerët.

Vizita e tretë u organizua gjatë datave 6 – 12 korrik 2021, dhe qëllimi i saj ishte të zhvillonte një plan monitorimi dhe përmirësimi në lidhje me efektivitetin e masave të kontrollit për secilin nga risqet e identifikuara. Si pjesë e kësaj vizite, trajnerët të shoqëruar nga pjesëmarrësit e shoqërive kryen vizita në terren në objekte të ndryshme të sistemeve të furnizimit me ujë, për të diskutuar nga pikëpamja praktike risqet e mundshme të identifikuara për ato objekte ose elementë të veçantë të sistemit.

Përveç prezantimeve të kryera nga trajnerët e SHUKALB, pjesëmarrësit u angazhuan në ushtrime dhe diskutime aktive rreth koncepteve dhe temave kryesore të axhendave përkatëse të trajnimit. Në fund të çdo dite trajnimi, pjesëmarrësve iu dhanë detyra shtëpie të cilat u prezantuan dhe u diskutuan në fillim të trajnimit të rradhës.

SHUKALB ka planifikuar një sesion final të vizitave dhe trajnimeve për 5 shoqëritë UK pjesëmarrëse gjatë shtatorit 2021, dhe deri në fund të Programit, secila shoqëri do të ketë zhvilluar një Plan standard të Sigurisë së Ujit dhe Menaxhimit të Krizave.

* RCDN është një projekt që po implementohet nga Fondi i Hapur Rajonal i GIZ (ORF), me financimin e Qeverive të Zvicrës dhe Gjermanisë dhe ka për qëllim krijimin e një Rrjeti për Zhvillimin e Kapaciteteve Rajonale të vetëqëndrueshme, me 16 shoqata të qeverisjes lokale dhe ujësjellës kanalizime në rajon