Dimër, ne nuk të frikësohemi – Shoqëritë Ujësjellës Kanalizime në Shqipëri marrin masa për përballimin e situatës së ngricave

Shqipëria përjetoi një mot të pazakontë gjatë muajit janar, ku temperaturat ranë me disa gradë nën zero, për të paktën katër ditë radhazi. Në veçanti zonat verilindore dhe juglindore të vendit, por edhe ultësira perëndimore pësuan ngrica. Megjithatë, kjo situatë e pazakontë nuk i ka zënë të papërgatitur shoqëritë ujësjellës kanalizime. SHUKALB ka qenë në kontakt me shoqëritë anëtare të tij që janë prekur më tepër, si UK Korçë, UK Pogradec, UK Bulqizë, por dhe UK Tiranë dhe UK Vlorë, duke u informuar mbi situatën dhe masat e marra prej tyre.

Masa e parë e ndërmarrë nga të gjitha Shoqëritë ishte ndërgjegjësimi i konsumatorëve për situatën, duke i informuar ata se si të sillen me ujëmatësit dhe tubacionet në stinën e dimrit.

Informimi u bë i mundur përmes postimeve të shpeshta nëpër rrjetet sociale të vetë shoqërive, si dhe intervistave në televizionet lokale. Gjithashtu, janë vendosur postera informues në ambjentet e kujdesit të klientit të shoqërive, hyrjet e pallateve, nëpër destinacione të ndyshme të qyteteve dhe të zonave rurale, së bashku me numrat e kontaktit, që qytetarët të telefonojnë në rast defektesh.

U ngritën grupe pune për monitorimin e situatës dhe u vunë në dispozicion specialistë të terrenit për të qenë pranë qytetarëve. Ata kanë dhënë udhëzimet e duhura për qytetarët se si duhet të shmangin defektet e vogla që kanë ndodhur në zonat e dukshme të tubacioneve të ujit.

Situata deri më tani është menaxhuar mjaft mirë prej shoqërive UK dhe furnizimi me ujë ka vazhduar normalisht.