Zhvillimi i një dokument projekti për zbatimin e zgjidhjeve të bazuara në natyrë për trajtimin e ujërave të ndotura në dy zona rurale në basenin e lumit Drin

Në shkurt 2022, SHUKALB është bërë pjesë e projektit të titulluar “Zhvillimi i një dokument projekti për zbatimin e zgjidhjeve të bazuara në natyrë për trajtimin e ujërave të ndotura në dy zona rurale në basenin e lumit Drin”. Projekti zbatohet në kuadër të Projektit “Promovimi i Menaxhimit të Qëndrueshëm të Burimeve Natyrore në Evropën Juglindore, nëpërmjet përdorimit të qasjes Nexus”, nga Global Water Partnership-Mediterranean (GWP-Med) në partneritet me Komisionin Ekonomik për Evropën të Kombeve të Bashkuara (UNECE), financuar nga Agjencia Austriake e Zhvillimit (ADA).

Objektivi i projektit është përgatitja e një dokumenti të plotë për zbatimin e zgjidhjeve të bazuara në natyrë për trajtimin e ujërave të ndotura në dy vendbanime të vogla/të mesme në basenin e lumit Drin, të cilat gjithashtu do të eksplorojnë sinergji për rikuperimin e lëndëve ushqyese, nxjerrjen e energjisë dhe ripërdorimin e ujit. Projekti do të zbatohet në 2 vendbanime pilot, një në Shqipëri dhe një në Kosovë.

Në këtë aktivitet, SHUKALB po punon në partneritet me kompaninë italiane IRIDRA, e specializuar në projektimin dhe zbatimin e teknologjive të tilla të trajtimit të ujërave të ndotura, si dhe me Universitetin e Shkencave të Natyrës BOKU në Vjenë, Austri.

Zgjidhjet e bazuara në natyrë për trajtimin e ujërave të ndotura konsistojnë në përdorimin e ligatinave, pellgjeve dhe lagunave dhe procesit të infiltrimit të tokës për trajtimin e ujërave të ndotura. Ato janë të përshtatshme veçanërisht për zona të vogla dhe mund të shkojnë deri në 10,000 PE. Përparësitë e tyre konsistojnë në kosto të ulëta investimi, si dhe konsum të ulët të energjisë dhe kostove të përgjithshme të operimit dhe mirëmbajtjes, duke arritur ndërkohë cilësinë e ujit në dalje siç kërkohet nga standardet e BE-së.