Ujësjellësi Kukës, zyra e kujdesit ndaj klientit e rinovuar sipas standardeve ndërkombëtare

Situata e krijuar si rezultat i pandemisë Covid 19 nxori në pah nevojën emergjente për të optimizuar ndërveprimet dhe përgjigjet midis ofruesve të shërbimeve dhe konsumatorëve në sektorin e ujit. Kufizimet e vendosura gjatë pandemisë, theksuan prioritetin e ndërmarrjes së rrugëtimit drejt përmirësimit të shërbimeve publike.

Sistemi i ankesave të klientëve për Ndërmarrjen e Ujësjellës-kanalizimeve është një mjet efektiv për të përmirësuar qeverisjen e mirë. Pa mekanizma efektivë të ankesave dhe ku mungon ndërgjegjësimi për të drejtat dhe përgjegjësitë, klientët nuk janë në gjendje të adresojnë ankesat e tyre.

Me mbështetjen e Qeverisë Gjermane nëpërmjet GIZ-it, në bashkëpunim me Bashkinë Kukës dhe Ujësjellësin Kukës, u rinovua tërësisht Qendra e Kujdesit ndaj Konsumatorit. Zyra ndodhet në qendër të qytetit, me hapësira të aksesueshme dhe ofron shërbime dinjitoze për 70 mijë qytetarë. Ndonëse ujësjellësi ofron shërbime shumë të rëndësishme për të gjithë qytetarët, gjendja e zyrës së kujdesit ndaj klientit në Kukës ka qenë nën standardet e kërkuara duke ndikuar jo vetëm në shëndetin e tyre psikologjik dhe fizik, por edhe në cilësinë e shërbimeve që u jepen qytetarëve.

“Infrastruktura ka qenë le të themi… në mënyrë metaforike “një burg i vogël”, tha Denard Gërmizi, qytetar i Kukësit.

Kushtet para rinovimit të zyrës ishin kritike. Ambienti i brendshëm ishte i dëmtuar, lagështi dhe myk kishte kudo, ambientet sanitare ishin jashtë funksionit dhe të dedraduara dhe shtresat e dyshemesë u dëmtuan plotësisht. Rehabilitimi i zyrës ka përmirësuar shërbimin ndaj klientëve, duke mundësuar pagesën e lehtë të faturave të ujit.

“Sfidë e madhe mbetet pagesa e faturave të ujit nga një numër i madh familjesh në Kukës. Ka pasur një rritje prej mbi 10% të kontratave të lidhura ndërmjet klientëve dhe Ujësjellësit. Ka një rritje me rreth 30% të pagesave të klientëve”, tha Eduard Spahia, administrator i Ujësjellësit Kukës.

Dr. Gabriele Lames, Menaxhere e Projektit te Ujit në GIZ Albania theksoi se ky është një përmirësim për klientët dhe punonjësit dhe në planin afatgjatë për investimet e ardhshme në Qendrën e Kujdesit ndaj Klientit në Kukës.

“Qëllimi i projektit është që të ketë një mirëkuptim për punën e ujësjellësit dhe së fundmi që njerëzit të jenë të gatshëm të paguajnë faturat e tyre, gjë që do të rrisë të ardhurat për Ujësjellësat duke ndikuar në investimet e ardhshme”, tha Dr. Lames.

Rinovimi i Qendrës së Kujdesit ndaj Klientit në Kukës dhe aksesi në Portalin e Shërbimit ndaj Klientit (www.shuk.al), një tjetër mjet i ofruar me mbështetjen e GIZ, e afron shërbimin ndaj klientit me standardet ndërkombëtare.