SHUKALB organizon Trajnimin Gjenerik për Trajnerët me temë “Të nxënit te të rriturit dhe aftësitë e buta në ofrimin e trajnimeve”

Në datën 16 nëntor 2022, në Tiranë, SHUKALB organizoi Trajnimin për Trajnerët (ToT) me temë “Të nxënit te të rriturit dhe aftësitë e buta në ofrimin e trajnimeve” në kuadër të projektit Rrjeti Rajonal për Zhvillimin e Kapaciteteve (RCDN) për Shërbimet e Furnizimit me Ujë dhe Kanalizimeve.

Në ToT morën pjesë trajnerë të SHUKALB dhe RCDN-së, të cilët përfaqësonin Shoqëritë Ujësjellës Kanalizime Tiranë, Shkodër, si dhe SHUKALB. ToT u drejtua nga Arian Gjorga, Ekspert i pavarur.

Objektivi kryesor i trajnimit ishte që pjesëmarrësit të merrnin njohuri teorike dhe praktike se si të planifikonin, organizonin dhe ofronin trajnime.

Pjesëmarrësit u njohën me tema të tilla si Llojet e trajnimit, Të nxënit te të rriturit, Projektimi i Trajnimit, Metodat e Mësimdhënies, Burimet e Mësimdhënies dhe të nxënit dhe Dhënia e Trajnimit. Trajnimi përfshiu disa diskutime interaktive në grup dhe ushtrime praktike.

Në ushtrimin e fundit, pjesëmarrësit u ndanë në grupe, ku ata zgjodhën një temë specifike dhe punuan mbi një plan prezantimi për trajnimin. Nga secili grup, një nga pjesëtarët e grupit prezantoi temën në formatin e një ofruesi të trajnimit.

Reagimet e marra në fund të trajnimit nga pjesëmarrësit ishin shumë pozitive, në lidhje me mënyrën e organizimit të trajnimit dhe aftësive të treguara nga trajneri.