Konferenca dhe Ekspozita e Përbashkët Ballkanike – 10 Vjetori i një Bashkëpunimi të Suksesshëm!

Më 8, 9, 10 Nëntor 2022, SHUKALB në bashkëpunim me SHUKOS (Shoqata e Ujësjellësve dhe Kanalizimit të Kosovës) organizuan Konferencën dhe Ekspozitën e 10-të të Përbashkët Ballkanike me temë “Ujërat nëntokësorë – Të bëjmë të padukshmen të dukshme”, në Hotel Emerald, në Prishtinë, Kosovë. Konferenca tërhoqi mbi 400 profesionistë të ujit që përfaqësonin shoqëritë ujësjellës kanalizime, komunitetin e donatorëve, kompani private, institucione akademike si dhe institucione të tjera të qeverisjes qendrore dhe vendore nga 16 vende të ndryshme.

Si zakonisht, Konferenca dhe Ekspozita e Përbashkët Ballkanike ofroi një platformë për diskutim, ku pjesëmarrësit patën mundësinë të ndanin njohuritë dhe përvojën e tyre në trajtimin e çështjeve të sektorit të ujit dhe krijimin e mundësive të rrjetëzimit midis profesionistëve të sektorit të ujit në Rajonin e Ballkanit.

Para fillimit të Ceremonisë së Hapjes, më 8 Nëntor, u organizuan disa evente para-konferencë duke përfshirë Forumin e Grupimit të Profesionistëve të Rinj të Ujit nga Kosova dhe Shqipëria; Workshopi Rajonal i Programit të Benchmarking për HUB-in Kosovë dhe Shqipëri, Takimi i Përbashkët me Palët e Interesit mbi “Zhvillimin e Kapaciteteve në Sektorin e Ujit dhe Advokimin e Shoqatave për Krijimin e një Mjedisi Mbështetës”, dhe Workshopi i Grupit DHI me temë “Analiza Hidraulike e Sistemit të Furnizimit me Ujë ose Binjakëve Dixhitalë për Menaxhimin e Ujit Pa të Ardhura dhe të Energjisë së Shoqërive Ujësjellës Kanalizime”.

Ceremonia e Hapjes në mbrëmjen e 8 nëntorit filloi me fjalën e mirëseardhjes të kryetarit nga Presidenti i SHUKOS, Zenel Zenelaj dhe Presidentit të SHUKALB, Petrit Tare, të cilët përshëndetën të pranishmit dhe i ftuan të ndjekin programin e konferencës gjatë dy ditëve të ardhshme, si dhe të vizitonin ekspozitën teknike të sektorit privat që organizohet paralelisht me konferencën.

Ceremonia e Hapjes vazhdoi me fjalët përshëndetëse të SH.T. Albin Kurti, Kryeministër, Republika Kosovës. Në fjalën e tij, ndër të tjera, SH.T. Albin Kurti tha: “Konferenca e përbashkët ballkanike është ngjarja më e rëndësishme për profesionistët e fushës së ujërave të Shqipërisë, Kosovës, të Maqedonisë së Veriut e të Malit të Zi, mban në vëmendje rëndësinë jetike që ka furnizimi me ujë dhe shërbimet e kanalizimit, si dhe promovon shkëmbimin e përvojave teknologjike dhe ofron një perspektivë për profesionistët e rinj të sektorit”.

Personalitete të tjera të cilët mbajtën fjalime përshëndetëse ishin SH.T. Thomas Kolly, Ambasador i Jashtëzakonshëm dhe Fuqiplotë, Ambasada Zviceriane, Kosovë, SH.T. Matthias Conrad, Zëvendës Ambasador i Jashtëzakonshëm dhe Fuqiplotë, Ambasada Gjermane, Kosovë, dhe Gábor Brandstätter, Drejtor i Zhvillimit të Biznesit Ndërkombëtar, Kompania e Ujit të Budapestit, Hungari.

Ceremonia e Hapjes vazhdoi me ceremoninë tradicionale të ndarjes së çmimeve për njohjen e përpjekjeve të individëve që kanë pasur ndikim në punën e tyre dhe në përmirësimin e sektorit të ujit. Bordi i Drejtorëve të SHUKALB nderoi me çmim Dr. Gabriele Lames, Menaxhere Programi, GIZ, me motivacionin: “Në shenjë vlerësimi dhe mirënjohje për kontributin e saj në sektorin e ujit në Shqipëri dhe mbështetjen e jashtëzakonshme për misionin e SHUKALB, veçanërisht për programet e Zhvillimit të Kapaciteteve për Shoqëritë Ujësjellës Kanalizime dhe programet e Edukimit dhe Ndërgjegjësimit të brezave të rinj”. Çmimi “Një Jetë në Sektorin e Ujit” iu dha Elia Pendavinji, Shoqëria Ujësjellës Kanalizime Korçë; Ing. Piro Ndreu, Shoqëria Ujësjellës Kanalizime Fier, Ing. Albert Tavanxhiu, Shoqëria Ujësjellës Kanalizime Pogradec dhe Kujtim Luli, Shoqëria Ujësjellës Kanalizime Shkodër.

Ceremonia e Hapjes përfundoi me hapjen zyrtare të ekspozitës.

Programi Teknik i Konferencës konsistoi në 16 sesione me tematika të ndryshme të organizuara në 12 sesione të ndryshme paralele dhe 4 Sesione Plenare, të cilat adresuan mbi 44 prezantime, duke mbuluar një gamë të gjerë temash të shumëanshme.

Programi Teknik i Konferencës filloi në mëngjesin datës 9 nëntor, me fjalën e mirëseardhjes nga Elisabeta Poçi, Drejtore Ekzekutive e SHUKALB, e cila dha një pasqyrë të aktiviteteve para-konferencë që u zhvilluan një ditë më parë dhe programit për ditën e parë të Konferencës. . Ajo vlerësoi edhe kontributin e sponsorëve që mbështetën organizimin e eventit.

Pjesëmarrësit në Konferencë u përshëndetën nga fjalimet e Sh.S. Linda Çavdarbasha, Zv. Ministre, Ministria e Mjedisit dhe Planifikimit Hapësinor dhe Infrastrukturës, Kosovë dhe Sh.S. Enkelejda Muçaj, Zv. Ministre, Ministria e Infrastrukturës dhe Energjisë, Shqipëri.

Konferenca vijoi me fjalimin e parë kryesor nga Aude Farnault, Ekonomiste dhe Analiste Politikash, Ekipi i Ujit, Drejtoria e Mjedisit, OECD, Francë e cili deklaroi se: “Ujërat nëntokësore përdoren gjithnjë e më shumë dhe përdorimi intensiv i ujërave nëntokësore çon në sfida të mëdha. Pompimi intensiv i ujërave nëntokësore mund të çojë në: Shterim afatgjatë të akuiferëve dhe eksternalitete të rëndësishme negative mjedisore, duke përfshirë: Shterimin e rrjedhave; Kripësimin dhe infiltrimin e ujërave të ndotura dhe ngjeshja e Akuiferit dhe fundosja e tokës”.

Sesioni i parë plenar i programit iu dedikua temes së përgjithshme të konferencës “Ujërat nëntokësorë – Të bëjmë të padukshmen të dukshme”. Sesioni u moderua nga Elisabeta Poçi, SHUKALB, dhe panelistët që iu bashkuan diskutimeve ishin Fidaim Sahiti, Program për Zhvillim të Agjencisë së Mjedisit në Kosovë, Agjencia Suedeze për Zhvillim Ndërkombëtar, Kosovë; Ylber Mirta, Shef i Departamentit për Ujërat, Ministria e Mjedisit dhe Planifikimit Hapësinor, Maqedonia e Veriut;  Petrit Tare, Administrator, Shoqëria Rajonale Ujësjellës Kanalizime Korçë dhe Dr. Arben Gjata, Lektor, Universiteti Fan S. Noli, Korçë.

Pas sesionit të parë plenare, programi vazhdoi me katër (4) sesione paralele “Menaxhimi i Burimeve Ujore”; “Menaxhimi Teknik i Shoqërive UK”; “Sfidat rregullatore” dhe “Menaxhimi i ujit pa të ardhura”.

Sesioni i dytë plenare “Rajonalizimi i Shërbimeve Ujësjellës Kanalizime: Sfidat dhe Mundësitë” u moderua nga Baton Begolli, Këshilli Ndërministror për Ujëra, Zyra e Kryeministrit, Kosovë. Paneli diskutues përbëhej nga Klevis Jahaj, Drejtor i Përgjithshëm, Agjencia Kombëtare Ujësjellës – Kanalizime dhe Infrastrukturës së Mbetjeve, Shqipëri; Ndriçim Shani, Kryetar i Komisionit Kombëtar Rregullator, Enti Rregullator i Ujit, Shqipëri; Afrim Lajçi, Këshilltar, Këshilli Ndërministror për Ujëra, Zyra e Kryeministrit, Kosovë; Camilo Lombana Cordoba, Specialist i Lartë për Furnizimin me Ujë dhe Kanalizimet, Banka Botërore, Shtetet e Bashkuara të Amerikës; Hajrie Morina, Drejtoreshë, Autoriteti Rregullator për Shërbimet e Ujit, Kosovë dhe Elisabeta Poçi, Drejtore Ekzekutive, SHUKALB.

“Menaxhimi Organizativ dhe Strukturor” dhe “Menaxhimi i Integruar i Aseteve” ishin sesionet e fundit të trajtuara gjatë ditës së parë të Konferencës.

Dita e dytë e Konferencës, 10 nëntor, u hap me fjalën e mirëseardhjes nga Abdullah Derguti, Drejtor Ekzekutiv i SHUKOS i cili pas një përmbledhje të shpejtë të ditës së mëparshme dhe pasi u uroi pjesëmarrësve mirëseardhjen në ditën e fundit të konferencës ftoi  SH.T Getoar Mjeku, Zëvendës Ministër, Ministria e Ekonomisë, Kosovë për të mbajtur një fjalim përshëndetës.

Konferenca vazhdoi me dy fjalime kryesore, Prof. Hamanth Kasan, CEO, Jyoti Human Development, Anëtar i Nderuar, Shoqata Ndërkombëtare e Ujit, Afrika e Jugut me temën “Shërbimet Ujësjellës Kanalizime në Kohë të Pasigurta: Përballja me Krizën Globale ” dhe Moritz Remé, Drejtor i Zyrës së KfW në Kosovë dhe Maqedoninë e Veriut, Banka Gjermane për Zhvillim KfW, Kosovë, me temë “Ndërtimi i Qëndrueshmërisë së Sektorit të Ujit në Kosovë – Një Qasje e Integruar”.

Sesioni i tretë Plenar, “Shërbimet Ujësjellës Kanalizime në Kohë të Pasigurta: Përballja me Krizën Globale” u moderua nga Premtim Islami, Zyra KfW, Kosovë. Për të diskutuar rreth kësaj teme, panelistët e ftuar ishin Klevis Jahaj, Drejtor i Përgjithshëm, Agjencia Kombëtare Ujësjellës – Kanalizime dhe Infrastrukturës së Mbetjeve, Shqipëri; Adem Ahmetaj, Njësia për Politika dhe Monitorim për Ndërmarrjet Publike, Ministria e Ekonomisë, Kosovë; Dr. Evis Gjebrea, Zv. Drejtoreshë e Përgjithshme, Shoqëria UK Tiranë, Shqipëri; Gábor Brandstätter, Drejtor për Zhvillimin e Biznesit Ndërkombëtar, Kompania e Ujit të Budapestit, Hungari dhe Dr. Katerina Schilling, Drejtore e Sekretariatit, Shoqata Ndërkombëtare e Kompanive të Ujit të Basenit të Lumit Danub, Austri.

Programi vazhdoi me sesionet paralele kushtuar “Kriza Energjitike: Sfidat dhe Masat Lehtësuese”; “Menaxhimi i Ujit të ndotur I” dhe “Menaxhimi i Shoqërive UK I” dhe “Menaxhimi i i Ujit të ndotur II”.

Sesioni Plenar final “Ekonomia Qarkulluese në Kontekstin e Ujërave të Ndotur” u moderua nga Prof. Asoc. Dr. Enkelejda Gjinali, Universiteti Politeknik i Tiranës, Shqipëri. Për të diskutuar rreth kësaj teme, panelistët e ftuar ishin Petrit Tare, Administrator, Shoqëria Rajonale Ujësjellës Kanalizime Korçë, Shqipëri; Leonat Muskollari, Këshilltar për Ujë dhe Kanalizime, Programi i Ujit, GIZ Shqipëri; Arbana Kola, Menaxhere Projekti, SHUKALB dhe Lorik Dervishaj, Inxhinier, Strabag AG, Kosovë.

Programi i Konferencës përfundoi me dy sesionet e fundit paralele me temën “Menaxhimi i Shoqërive UK II” dhe “Cilësia e Ujit të Pijshëm”.

Ekspozita Teknike

Pjesëmarrësit në Konferencë patën mundësinë të vizitonin Ekspozitën Teknike e cila u hap zyrtarisht më 8 nëntor, pas pritjes Gala dhe vazhdoi për dy ditë paralelisht me Programin Teknik në datat 9 dhe 10 nëntor. Ekspozita tërhoqi 23 kompani private nga 10 vende të ndryshme nga rajoni i Ballkanit, Evropa, si dhe Izraeli, të cilat shfaqën produktet e tyre më të fundit, nga tubat, pompat, matësat, softuerët deri te shërbimet inxhinierike dhe menaxhuese.

Si tradicionalisht në Ekspozitë, SHUKALB dhe SHUKOS organizuan një stendë të përbashkët, e vendosur pranë hyrjes së sallës së ekspozitës, ku pjesëmarrësit patën mundësinë të informoheshin mbi aktivitetet përkatëse të secilës shoqatë, si dhe për nismat e përbashkëta. .

SHUKALB dhe SHUKOS dëshirojnë të falënderojnë organizatat dhe kompanitë që mbështetën organizimin e Konferencës dhe Ekspozitës së 10-të të Përbashkët Ballkanike, në veçanti Budapest Water Works dhe Hotel Emerald.

Dëshirojmë të ndajmë me ju prezantimet e mbajtura gjatë ditëve të konferencës, si dhe disa foto nga eventi. Ju lutemi klikoni në linqet e mëposhtme për të parë materialet:

• • Prezantimet
  • Fotot e Konferencës dhe Ekspozitës