Kontrolli aktiv i rrjedhjeve në rrjetin e ujësjellësit – Një praktikë e mirë nga Shoqëria Rajonale Ujësjellës Kanalizime Korçë

Kontrolli aktiv i rrjedhjeve në rrjetin e ujësjellësit – Një praktikë e mirë nga Shoqëria Rajonale Ujësjellës Kanalizime Korçë

Menaxhimi i ujit pa të ardhura prek të gjitha aspektet e operimit të qëndrueshëm të një sistemi ujësjellësi. Krahas ndikimeve ekonomike, teknike dhe sociale, uji pa të ardhura ka dhe ndikime ekologjike. Këto ndikime pasqyrohen në përdorimin e lartë të burimeve ujore siç janë ujrat nëntokësore, por gjithashtu dhe në konsumin shtesë të energjisë elektrike dhe për rrjedhojë, rritjen e dioksidit të karbonit të çliruar në atmosferë.

Qyteti i Korçës furnizohet nga akuiferi i Turanit pra nga ujra nëntokësore dhe Shoqëria Rajonale Ujësjellës Kanalizime Korçë ka ndërtuar një program të qartë dhe efektiv për menaxhimin e ujit pa të ardhura. Në fokus të këtij menaxhimi është kontrolli aktiv i rrjedhjeve, i cili synon të zvogëlojë sa më shumë ndikimet negative që sjell uji pa të ardhura.

Kontrolli aktiv i rrjedhjeve fillon me analizën e situatës aktuale të një sistemi ujësjellësi.

Për të kryer “diagnozën” e një sistemi duhet të përcaktohet vlera e Indeksit të rrjedhjeve infrastrukturore (ILI) përmes së cilit përcaktojmë kategorinë e performancës së menaxhimit të humbjeve reale. Informacioni që jep ky indeks nxjerr në dukje “pikat e dobëta” të sistemit dhe na orienton qartë si duhet të zhvillohet një program efektiv për kontrollin aktiv të rrjedhjeve.

Shoqëria Rajonale Ujësjellës Kanalizime Korçë ka një njësi të dedikuar për kontrollin aktiv të rrjedhjeve. Personeli i kësaj njësie është i trajnuar dhe i specializuar për përdorimin e të gjitha pajisjeve që përdoren për detektimin e çarjeve në rrjet.

Programi ditor i detajuar shoqërohet me të gjithë dokumentacionin teknik si p.sh. AS_BUILD (Projekti i Zbatuar i rrjetit) dhe të dhëna të tjera për një përdorim sa më efektiv të pajisjeve, reduktimin e kohës të kontrolleve dhe rritjen e zonave të kontrollit për mbulim sa më të gjerë.

Rezultatet e këtyre kontrolleve pasqyrohen në çdo aspekt të operimit të ujësjellësit dhe lidhen drejtpërdrejt me uljen e ndikimeve negative mbi përdorimin e ujrave nëntokësore.

Shënim: përmbajtja e mësipërme është shkruar nga Ing. Thoma Koroveshi, Inxhinier Hidroteknik, Përgjegjës i Njësisë së Humbjeve, Shoqëria Rajonale Ujësjellës Kanalizime Korçë, ndërsa punimi i plotë i kësaj teme u prezantua nga z. Koroveshi gjatë Konferencës dhe Ekspozitës së 10-të të Përbashkët Ballkanike të mbajtur më 8-10 Nëntor 2022, në Prishtinë, Kosovë. Ju mund të aksesoni prezantimin e plotë përmes këtij LINKU.

Thoma Koroveshi ka kryer studimet e larta në Universitetin Politeknik të Tiranës, Fakulteti i Inxhinierisë së Ndërtimit dhe zotëron diplomë Master i Shkencave në Inxhinieri Hidroteknike. Ai ka një përvojë pune 5 vjeçare në Projektim, Zbatim dhe Menaxhim në sektorin Ujësjellës-Kanalizime. Aktivitetet kryesore të tij përfshijnë hartimin e Projekteve të Zbatimit për skemat e furnizimit me ujë dhe kanalizimeve. Gjithashtu, në pjesën e manaxhimit, është specializuar për hartimin e strategjive për zvogëlimin e humbjeve dhe përdorimin e pajisjeve për kontrollin aktiv të rrjedhjeve.