Miratohet në parlament projektligji “Për ratifikimin e marrëveshjes së huase, ndërmjet Republikës së Shqipërisë dhe Bankës Ndërkombëtare për Rindërtim dhe Zhvillim, për Programin Kombëtar të Modernizimit të Sektorit të Ujësjellës-Kanalizimeve në Shqipëri”

Miratohet në parlament projektligji “Për ratifikimin e marrëveshjes së huase, ndërmjet Republikës së Shqipërisë dhe Bankës Ndërkombëtare për Rindërtim dhe Zhvillim, për Programin Kombëtar të Modernizimit të Sektorit të Ujësjellës-Kanalizimeve në Shqipëri”

Programi Kombëtar i Modernizimit të Sektorit të Furnizimit me Ujë dhe Kanalizimeve në Shqipëri” synon të mbështesë në nivel kombëtar infrastrukturën ujore duke patur si objektiv përmirësimin e performancës operative dhe financiare  të furnizimit me ujë dhe kanalizimeve të ndërmarrjeve të ujësjellës kanalizimeve, si dhe rritjen e aksesit për një menaxhim të sigurt të furnizimit me ujë në të gjithë Shqipërinë.

Gjatë muajt mars 2023, përfaqësues të AKUM dhe Ministrisë së Infrastrukturës dhe Energjisë kanë prezantuar marrëveshjen e huasë në komisionet përkatëse të Parlamentit të Shqipërisë dhe sëfundmi është marrë miratimi i saj në Parlament.

Programi është bashkëfinancim i Qeverisë Shqiptare dhe Bankës Ndërkombëtare për Rindërtim e Zhvillim (IBRD). Vlera totale e huasë është 75 mil USD për një afat 60 muaj, ndërkohë që programi do të mbështetet edhe nga një grant i qeverisë Zvicerane në shumën deri 6.3 mln USD.

Ky program synon të kontribuojë drejtpërsëdrejti në përmbushjen e objektivave të Qeverisë për të arritur aspiratat e Strategjisë Sektoriale Kombëtare 2019-2030 drejt një sektori të organizuar të ujit dhe ujrave të ndotura që ofron shërbime cilësore, duke nxitur shëndetin dhe ekonominë.

Në kuadër të ristrukturimit të sektorit të ujësjellës kanalizimeve në nivel kombëtar, programi ofron mbështetje dhe financim për prioritetet e identifikuara, dhe të përfshira në programin e qeverisë si:

• përmirësimi i efiçencës së energjisë;
• rritja e aksesit të furnizimit me ujë në zonat rurale dhe urbane;
• mbështetje finaciare për shoqëritë e UK-ve për zbutjen e pasojave të krizës Covid-19 dhe mbështetje për reformën e përgjithshme në sektorin e ujit.

Banka Ndërkombëtare për Rindërtim dhe Zhvillim për herë të parë në sektorin e infrastrukturës ujore do të financojë programin me një instrument të ri huaje të quajtur Program for Results (P4R), i cili do të mundësojë fokusimin në rezultatet e synuara (ndryshe nga financimi tradicional që nuk ka stimuj të qartë për përmirësimin e performancës).

Disbursimi i fondeve të huaja do të lidhet me plotësimin e disa kritereve\treguesve nga ana e përfituesve (NJQV\NUK) që në skemën e këtij financimi quhen Tregues të Lidhur me Disbursimin, ose Rezultate të Lidhur me Disbursimin.

Përfitimet (outputet) e këtij programi janë si mëposhtë:

• Ofrim i sigurt, i besueshëm, i mjaftueshëm dhe me cilësi i shërbimeve të furnizimit me ujë për të gjithë popullsinë e Shqipërisë;
• Rritja e nivelit të performancës të shërbimit ndaj klientëve;
• Rritje e performancës operacionale dhe financiare e ndërmarrjeve të ujësjellës kanalizimeve, dhe e aftësive menaxheriale;
• Rritje e vendeve të punës dhe të ardhurave në zonat rurale;
• Rritje e turizmit;
• Rritje e qëndrueshmërisë së klimës (përmbytje, thatësira, rrëshqitjet e dheut, etj);
• Nxitje e procesit te integrimit në EU.