Shoqëria Ujësjellës Kanalizime Vlorë merr masa për pastrimin e stacioneve të pompimit të kanalizimeve të ujërave të ndotura

Shoqëria Ujësjellës Kanalizime Vlorë merr masa për pastrimin e stacioneve të pompimit të kanalizimeve të ujërave të ndotura

Në kuadër të masave për sezonin turistik, Shoqëria Ujësjellës Kanalizime Vlorë, po kryen shërbime dhe po pastron stacionet e pompimit t Kanalizimeve të Ujërave të Ndotura (KUN) në qytet dhe përgjatë vijës bregdetare. Stacionet KUN janë objekte të rëndësisë së veçantë dhe të tilla trajtohen nga specialistët e UK Vlorë duke patur vëmendje të shtuar sidomos në këtë periudhë të sezonit.

Sezoni turistik katërfishon numrin e popullatës në Vlorë duke rritur edhe ngarkesën në rrjet. Pikërisht për këtë qëllim pastrimi i stacioneve realizohet në mënyrë periodike. Gjithashtu realizohen edhe shërbime të pompave si dhe mbajtja në kontroll e paneleve elektrike. Vëmendje të shtuar kanë nga UK Vlorë, Stacionet KUN në “Lungomare”, shëtitoren bregdetare. Po ashtu vazhdon mirëmbajtja dhe pastrimi edhe në Stacionin e Orikumit.

Gjatë punës së realizuar është evidentuar bllokime të pompave nga mbeturinat, për këtë arsye UK Vlorë, i ka bërë thirrje qytetarëve të mos hedhin mbeturina në rrjet pasi krijohen probleme në funksionimin e kanalizimeve.

Pastrimi dhe zhbllokimi i pusetave është një tjetër punë e përditshme në të gjithë qytetin. Për punonjësit e Sektorit të Kanalizimeve dita nis në orët e para të mëngjesit. Ata janë njerëz të sakrificës, teksa punën e fillojnë të parët, ende pa filluar xhirot e qytetarëve dhe pushuesve. Shërbimi i mirë mbetet fokusi i UK Vlorë në këto ditë të nxehta të sezonit turistik.