Fjala përshëndetëse e Ambasadores së Zvicrës në Shqipëri, Sh.S. Ruth Huber në ceremoninë e hapjes së Konferencës dhe Ekspozitës së 11-të të Përbashkët Ballkanike

Të nderuar kryetarë të Shoqatave të Ujit të Shqipërisë dhe Kosovës, Z. Tare dhe Z. Shabani,

Të dashur partnerë,

Urime që mblodhët palët e interesit dhe institucionet që menaxhojnë sektorin e ujit.

Në ftesën dhe programin e kësaj konference thuhet qartë: ne duhet të përshpejtojmë ndryshimin për të arritur Objektivin 6 të Zhvillimit të Qëndrueshëm – sigurimin e aksesit në shërbimet e ujit dhe kanalizimeve të menaxhuara në mënyrë të sigurt. Zvicra mbështet plotësisht përpjekjet për të përmbushur këtë objektiv si pjesë e Agjendës 2030 të Kombeve të Bashkuara.

Aksesi në shërbimet e ujit dhe kanalizimeve është një e drejtë humane dhe një mundësi themelore e prosperitetit ekonomik. Por në mbarë botën ka ende segmente të popullsisë që nuk kanë akses në këto shërbime.

Prandaj, mbështetja në sektorin e ujit ka qenë një pjesë e rëndësishme e përpjekjeve të bashkëpunimit ndërkombëtar të Zvicrës. Programi i bashkëpunimit zviceran në Shqipëri dhe gjithashtu në Kosovë ka një komponent të dedikuar për mbështetjen e sektorit të ujit.

Zvicra është angazhuar me Shqipërinë në sektorin e ujit për më shumë se dy dekada. Që nga viti 2003, ne kemi dhënë një kontribut total prej 42 milionë frangash zvicerane për të mbështetur shërbimet e qëndrueshme të furnizimit me ujë dhe menaxhimit të ujërave të ndotura përmes programeve të përbashkëta me Gjermaninë, BE-në dhe Bankën Botërore. Zvicra gjithashtu mbështet nisma më të gjera në Ballkanin Perëndimor si Rrjeti Rajonal i Zhvillimit të Kapaciteteve dhe Qendra e Ekselencës – Shoqëria UK e së Ardhmes e lançuar së fundmi. Sipas mendimit tonë, ky është çelësi për nxitjen e rritjes ekonomike dhe prosperitetit të qëndrueshëm në vend.

Ndërsa reforma e sektorit të ujit në Shqipëri përparon, fokusi është tani në trajtimin e sfidave të tilla si mbulimi me kosto të ulët dhe nivelet e arkëtimit të faturave të shërbimit, borxhet e larta dhe humbjet teknike dhe tregtare, lidhjet e paligjshme dhe infrastruktura e vjetëruar.

Janë tre tipare kryesore të kontributit tonë zviceran në këtë sektor:

Së pari, Zvicra vendos në qendër të mbështetjes së saj forcimin institucional të shoqërive ujësjellës kanalizime, duke ndërtuar shoqëri efektive, efiçente dhe fleksibile të cilat mund të ofrojnë shërbime të menaxhuara në mënyrë të sigurt për popullatën, në përputhje me SDG6. Ky ka qëllimin përfundimtar ofrimin e shërbimeve me cilësi të lartë për popullsinë.

Së dyti, Zvicra ka mbështetur mekanizmat e bazuar në performancë në dy nivele: brenda shoqërive UK dhe në nivel sektori. Një shembull është instrumenti inovativ i financimit i Bankës Botërore i quajtur “Programi për Rezultate” (“P për R”) i përdorur për të mbështetur reformën e sektorit në Shqipëri.

Së treti, Zvicra promovon një qasje holistike, duke marrë parasysh të gjithë ciklin e ujit urban – duke përfshirë furnizimin me ujë, ujërat e ndotura dhe menaxhimin e ujërave të shiut. Lidhjet midis menaxhimit të riskut nga fatkeqësitë, zhvillimit urban dhe ujit janë gjithnjë e më të rëndësishme përballë ndryshimeve klimatike.

Në përgjithësi, qasja zvicerane synon të mundësojë funksionimin dhe mirëmbajtjen e qëndrueshme të infrastrukturës së re dhe ekzistuese. Si i tillë, në mënyrë indirekte po kontribuon në qëndrueshmërinë e të gjitha investimeve të bëra në sektorin e furnizimit me ujë dhe kanalizimeve.

Të nderuar partnerë, ju përgëzoj edhe për faktin që kjo konferencë drejtohet nga shoqatat e sektorit të ujit! SHUKOS dhe SHUKALB janë partnerë të vjetër të Rrjetit Rajonal të Zhvillimit të Kapaciteteve (RCDN) dhe ne jemi të kënaqur të shohim kontributin e tyre në rritje në ndarjen e njohurive, rrjetëzimin dhe shkëmbimet në sektorin e ujit në të gjithë rajonin. Është e mrekullueshme të shohësh shoqata profesionale që janë aktive, duke kontribuar në ndarjen e njohurive, rrjetëzimin dhe shkëmbimet.

Ju uroj diskutime të frytshme gjatë dy ditëve të ardhshme.

Faleminderit!