Ja dolëm sërish: Konferenca dhe Ekspozita e 11-të e Përbashkët Ballkanike, “Të Përshpejtojmë Ndryshimin: Drejt Shërbimeve të Sigurta, të Besueshme dhe të Qëndrueshme”, një sukses i madh

Konferenca dhe Ekspozita jonë e 11-të e Përbashkët Ballkanike, “Të Përshpejtojmë Ndryshimin: Drejt Shërbimeve të Sigurta, të Besueshme dhe të Qëndrueshme“, organizuar nga SHUKALB në bashkëpunim me SHUKOS, më 7-9 nëntor 2023, në Golem, Shqipëri, mblodhi mbi 450 profesionistë të ujit që përfaqësonin shoqëritë ujësjellës kanalizime, komunitetin e donatorëve, kompani private, institucione akademike si dhe institucione të tjera të qeverisjes qendrore dhe vendore nga 18 vende të ndryshme. Konferenca ofroi një platformë për të diskutuar çështje jetike, shkëmbim informacioni dhe ndarjen e përvojave, me objektiv të përgjithshëm zhvillimin e mëtejshëm të sektorit të furnizimit me ujë dhe kanalizimeve në rajon.  Në këtë artikull do të japim një përmbledhje të këtij eventi.

Përpara fillimit të Ceremonisë së Hapjes, më 7 Nëntor, u organizuan disa aktivitete para-konferencë duke përfshirë Workshopin mbi “Përvojat Ballkano-Gjermane në fushën e trajtimit të ujërave të ndotura dhe trajtimit të llumit. Kërkesat ligjore, teknologjitë, efiçenca e energjisë”; Forumi i Profesionistëve të Rinj të Ujit nga Kosova dhe Shqipëria, Seminari Rajonal i Programit Benchmarking UBP për HUB-in e Kosovës dhe Shqipërisë dhe Takimi i Përbashkët Koordinues me Palët e Interesit mbi Zhvillimin e Kapaciteteve në Sektorin Ujësjellës Kanalizime në Shqipëri dhe Kosovë

Aktiviteti kryesor i para-konferencës ishte lançimi i Qendrës së Ekselencës – Shoqëria UK e së Ardhmes (UoF-CoE), një nismë  transformuese e Bankës Botërore e mbështetur nga Sekretariati i Shtetit Zviceran për Çështjet Ekonomike (SECO). Kjo nismë rajonale me një qasje globale, do të shërbejë si një inkubator kushtuar dijes, inovacionit dhe bashkëpunimit në sektorin e ujit. Qendra (UoF-CoE) do të bashkojë profesionistët e rinj, ofrues të shërbimeve të ujësjellës kanalizimeve, institucionet qeveritare dhe ekspertë nga fusha të ndryshme.

Gjatë aktivitetit të lançimit, z. Winston Yu, Menaxher i Praktikës së Ujit për Rajonin e Evropës dhe Azisë Qendrore, Banka Botërore, Austri, tha në fjalën e tij: “Nëse vendet në Ballkanin Perëndimor do të vazhdojnë të ndjekin rrugën e deritanishme, aksesi për ujë dhe sanitet nuk do të jetë i mundur të arrihet për gjeneratën tonë. Ne kemi nevojë për më shumë angazhim për të forcuar përpjekjet tona për të rritur performancën e ofruesve të shërbimeve, e sidomos tani që përballemi me kërcënimin e ndryshimeve klimatike. Me inovacion, njohuri dhe bashkëpunim Qendra e Ekselencës-Shoqëritë UK të së ardhmes do të mbështesi dhe do të fuqizojë këto shoqëri në të gjithë rajonin për t’a bërë një realitet të prekshëm për qytetarët e vendeve të rajonit arritjen e Objektivit të Zhvillimit të Qendrueshëm 6”.

Ceremonia e hapjes së Konferencës në mbrëmjen e 7 nëntorit filloi me fjalën përshëndetëse të presidentit të SHUKALB, Petrit Tare dhe presidentit të SHUKOS, Jeton Shabani, të cilët i përshëndetën të pranishmit dhe i ftuan të ndjekin programin e konferencës gjatë dy ditëve të ardhshme dhe të vizitonin ekspozitën teknike të sektorit privat e organizuar paralelisht me konferencën.

Ceremonia e hapjes vazhdoi me fjalën përshëndetëse të Sh.S. Ruth Huber, Ambasadore e Jashtëzakonshme dhe Fuqiplotë, Ambasada Zvicerane, Shqipëri, Sh. T Iven Schad, Sekretar i Parë, Ambasada e Republikës Federale të Gjermanisë në Shqipëri dhe Sh. T. Skënder Durmishi, Ambasador i Jashtëzakonshëm dhe Fuqiplotë, Ambasada e Republikës së Kosovës në Shqipëri.

Në fjalën e saj Ambasadorja Huber tha: “Aksesi në shërbimet e ujit dhe kanalizimeve është një e drejtë humane dhe një mundësi themelore e prosperitetit ekonomik. Por në mbarë botën ka ende segmente të popullsisë që nuk kanë akses në këto shërbime. Prandaj, mbështetja në sektorin e ujit ka qenë një pjesë e rëndësishme e përpjekjeve të bashkëpunimit ndërkombëtar të Zvicrës. Programi i bashkëpunimit zviceran në Shqipëri dhe gjithashtu në Kosovë ka një komponent të dedikuar për mbështetjen e sektorit të ujit.”

Ceremonia e hapjes vazhdoi me ceremoninë tradicionale të ndarjes së çmimeve për njohjen e përpjekjeve të individëve që kanë pasur ndikim në punën e tyre dhe në përmirësimin e sektorit të ujit. Çmimi i SHUKALB “Një jetë në sektorin e ujit” iu dhanë Bora Kolbuçaj, Shoqëria Rajonale Ujësjellës Kanalizime Lezhë dhe Agim Poçka, Shoqëria Rajonale Ujësjellës Kanalizime Durrës. Çmimi i Bordit të Drejtorëve të SHUKOS iu dha Burbuqe Nushi Latifi, Instituti Kombëtar për Shëndet Publik, ndërsa çmimi “Një jetë në sektorin e ujit” iu dhanë Agim Demaj, Kompania Rajonale e Ujësjellësit Prishtinë dhe Avni Caka, Kompania Rajonale e Ujësjellësit Gjakovë.

Ceremonia e hapjes u përmbyll me hapjen zyrtare të Ekspozitës Teknike.

Programi Teknik i Konferencës konsistoi nga 14 sesione me tematika të ndryshme të organizuara në 10 sesione të ndryshme paralele dhe 4 sesione plenare, të cilat trajtuan mbi 41 prezantime, duke mbuluar një gamë të gjerë temash të shumëanshme.

Programi Teknik i Konferencës filloi në mëngjesin e datës 8 Nëntor, me fjalën e mirëseardhjes nga Elisabeta Poçi, Drejtore Ekzekutive e SHUKALB, e cila bëri një pasqyrë të aktiviteteve parakonferencës që u zhvilluan një ditë më parë dhe programit për ditën e parë të Konferencës. . Ajo vlerësoi edhe kontributin e sponsorëve që mbështetën organizimin e eventit.

Konferenca vazhdoi me fjalimin e parë kryesor nga Gustavo Saltiel, Drejtues Global për Furnizimin me Ujë dhe Kanalizimet, Banka Botërore, SHBA, i cili mbajti një prezantim të regjistruar paraprakisht me temë “Reformat e politikave institucionale dhe rregullatore për përshpejtimin e ndryshimit në ofrimin e shërbimeve të furnizimit me ujë dhe kanalizimeve”.. 

Sesioni i parë plenar i programit me titull “Shoqëritë Ujësjellës Kanalizime si Forca Drejtuese për Përshpejtimin e Aksesit Universal drejt SDG-6” ishte në linjë me temën e përgjithshme të konferencës. Sesioni u moderua nga Camilo Lombana Cordoba, Specialist i Lartë për Furnizimin me Ujë dhe Kanalizimet, Banka Botërore, SHBA dhe u bashkë-moderua nga Megi Marku, Profesioniste e Re e Ujit, Qendra e Ekselencës – Shoqëria Ujësjellës Kanalizime e së Ardhmes, Shqipëri. Panelistët që iu bashkuan diskutimeve ishin Klevis Jahaj, Drejtor i Përgjithshëm, Agjencia Kombëtare e Ujësjellës Kanalizimeve (AKUK), Shqipëri; Baton Begolli, Këshilltar për Politikat e Ujit, Zyra e Kryeministrit, Kosovë, Bojana Kalezic, Drejtore e Departamentit të Shërbimeve Vendore, Ministria e Ekologjisë, Planifikimit Hapësinor dhe Urbanizmit, Mali i Zi; Marko Krneta, Drejtor Departamenti, Ministria e Bujqësisë, Administrimit të Ujërave dhe Pyjeve, Republika Srpska, Bosnjë dhe Hercegovinë.

Sesioni i dytë plenar “Përqasje Pragmatike ndaj Rregullimit Dinamik dhe të Orientuar në Veprime të Shërbimeve Ujësjellës Kanalizime” u moderua nga Dr. Julián D. López-Murcia, Drejtor, Nalanda Analytica, Kolumbi dhe u bashkë-moderua nga Erdonita Humolli, Menaxhere Projektesh dhe Profesioniste e Re e Ujit, SHUKOS.  Panelistët që iu bashkuan diskutimeve ishin Christian Minelli, Marrëdhëniet Evropiane, ARERA; Drejtor i Sekretariatit Shoqata Evropiane për Rregullatorët e Ujit, Itali;Ndriçim Shani, Kryetar i Komisionit Kombëtar Rregullator, Enti Rregullator i Ujit, Shqipëri; Hajrie Morina, Drejtore, Autoriteti Rregullator për Shërbimet e Ujit, Kosovë; Shamil Rexhepi, Udhëheqës i Njësisë për Çështje Ekonomike, Rregullatori i Shërbimeve të Energjisë dhe Ujit, Maqedonia e Veriut.

Sesioni i tretë plenar “Sfidat e Fuqisë Punëtore: Tërheqja, Mbajtja dhe Zhvillimi i Stafit Menaxherial dhe Profesionistëve të Rinj të Ujit” u moderua nga Karin Gallandat, Menaxhere Programi, Sekretariati Shtetëror Zviceran për Çështjet Ekonomike, Zvicër dhe u bashkë-moderua nga Elsa Belba, Inxhiniere dhe Profesioniste e Re e Ujit, AKUK, Shqipëri. Panelistët që iu bashkuan diskutimeve ishin Elisabeta Poçi, Drejtore Ekzekutive,, SHUKALB; Josh Newton, Konsulent i Pavarur për Proceset Globale të Politikave të Ujit, Themelues, Josh’s Water Jobs, SHBA; Pavle Donev, Drejtues i Projektit Rrjeti Rajonal i Zhvillimit të Kapaciteteve për Furnizimin me Ujë dhe Kanalizimet, GIZ, Maqedonia e Veriut; Walter Kling, President, Shoqata Ndërkombëtare e Kompanive të Ujit të Basenit të Lumit Danub, Austri; Albert Salltakaj, Kryetar, Profesionistët e Rinj të Ujit, Kosovë dhe Prof. Asoc. Oltion Marko, Shef i Departamentit të Inxhinierisë së Mjedisit, Fakulteti i Inxhinierisë së Ndërtimit, UPT, Shqipëri.

Programi i Konferencës vazhdoi me sesione paralele kushtuar Menaxhimit Teknik të Shoqërive UK; Menaxhimi i Integruar i Burimeve Ujore dhe Harmonizimi me Direktivat Kuadër të BE-së.

Dita e dytë e Konferencës, 9 Nëntor, u hap me fjalën e mirëseardhjes nga Abdullah Derguti, Drejtor Ekzekutiv i SHUKOS, i cili përshëndeti pjesëmarrësit dhe prezantoi një përmbledhje të shpejtë të një dite më parë. Në vazhdim, ai ftoi Arne Gooss, Drejtor i Sektorit të Infrastrukturës Urbane për Evropën Jug-Lindore dhe Turqinë, Banka Gjermane për Zhvillim KfW, Gjermani për të mbajtur fjalimin e tij kryesor me temë “Financimet në Sektorin e Ujit në Vendet e Ballkanit Perëndimor: Qasja e Bankës Gjermane për Zhvillim KfW”.

Sesioni i katërt dhe i fundit plenar, Financimi i Sektorit Ujësjellës dhe Kanalizime u moderua nga Semira Kasimati Vathi, Drejtore e Zyrës së Konsulencës, Valuadd Management Services, Shqipëri dhe u bashkë-moderua nga Bekim Juniku, SHUKOS. Panelistët që iu bashkuan diskutimeve ishin Flauers Shoshi, Zëvendës Drejtor i Përgjithshëm, AKUK; Evis Gjebrea, Zëvendës drejtoreshë e Përgjithshme, Shoqëria Ujësjellës Kanalizime Tiranë; Adelina Farrici, Drejtore Ekzekutive, Shoqata për Autonomi Vendore, Shqipëri; Valon Prebreza, Drejtor, Njësia për Politika dhe Monitorim për Ndërmarrjet Publike, Ministria e Ekonomisë, Kosovë; Dirk Vallerien, Inxhinier i Lartë, Sektori i Infrastrukturës Urbane për Evropën Jug-Lindore dhe Turqinë, Banka Gjermane për Zhvillim KfW; dhe Arsim Fetahu, Kryeshef Ekzekutiv, Kompania Rajonale e Ujësjellësit Prishtinë, Kosovë.

Programi vazhdoi me sesione teknike paralele kushtuar “Rajonalizimit të Shërbimeve: Sfidat dhe Mundësitë”, “Njohuritë dhe Qasjet Inova?ve për Shoqëritë UK”; “Aspektet Rregullatore”; “Menaxhimi i Ujërave të Ndotura” dhe “Menaxhimi i Klientëve”.

Ekspozita Teknike

Pjesëmarrësit e Konferencës patën mundësinë të vizitonin Ekspozitën Teknike e cila u hap zyrtarisht më 7 nëntor, pas pritjes së mirëseardhjes dhe vazhdoi për dy ditë paralelisht me Programin Teknik në datat 8 dhe 9 nëntor. Ekspozita tërhoqi 21 kompani private të ardhura nga 10 vende të ndryshme nga rajoni i Ballkanit dhe Evropa, të cilat shfaqën produktet e tyre më të fundit, nga tubat, pompat, matësat, softuerët deri te shërbimet inxhinierike dhe menaxhuese.

Si tradicionalisht në Ekspozitë, SHUKALB dhe SHUKOS organizuan një stendë të përbashkët, e vendosur pranë hyrjes së sallës së ekspozitës, ku pjesëmarrësit patën mundësinë të informoheshin mbi aktivitetet përkatëse të secilës shoqatë, si dhe për nismat e përbashkëta. .

SHUKALB dhe SHUKOS dëshirojnë të falënderojnë organizatat dhe kompanitë që mbështetën organizimin e Konferencës dhe Ekspozitës së 11-të të Përbashkët Ballkanike, veçanërisht Projektin Rrjeti Rajonal i Zhvillimit të Kapaciteteve (RCDN) dhe Bankën Botërore.

Dëshirojmë të ndajmë me ju prezantimet e mbajtura gjatë ditëve të konferencës, si dhe disa foto nga eventi. Ju lutemi klikoni në linqet e mëposhtme për të parë materialet:

• Prezantimet
• Fotot e Konferencës dhe Ekspozitës