Vlerësimi dhe përpjekjet e planifikimit të SHUKALB për programet e Zhvillimit të Kapaciteteve në Sektorin e Ujit në vitin 2024

SHUKALB vazhdon praktikën vjetore të dedikimit gjatë muajit janar për të vlerësuar dhe planifikuar për programet e zhvillimit të kapaciteteve në vitin vijues. Në përgatitje për vitin 2024, SHUKALB po kryen një anketë për vlerësimin e nevojave për trajnime (TNA) për të identifikuar boshllëqet për trajnime specifike dhe për të identifikuar dijen dhe aftësitë e nevojshme nga stafi i shoqërive ujësjellës kanalizime (UK). Kjo anketë është shpërndarë te të gjitha shoqëritë UK në Shqipëri.

Rezultatet e anketës TNA do të shqyrtohen në një takim validimi me përfaqësues nga grupe të ndryshme interesi, përfshirë AKUK, ERRU, shoqëritë UK, Shoqata për Autonomi Vendore, trajnerët dhe organizatat donatore/IFI. Kjo qasje bashkëpunuese siguron një kuptim të plotë të nevojave për trajnim brenda sektorit UK. Pas këtij procesi, SHUKALB do të përgatisë kalendarin e trajnimeve për vitin 2024.

Në të njëjtën kohë, SHUKALB ka hartuar disa programe për zhvillimin e kapaciteteve (ZHK) për vitin 2024, të përshtatura posaçërisht për të adresuar nevojat e shoqërive UK dhe sektorit më të gjerë të ujit. Këto programe janë krijuar në bashkëpunim me partneritetet strategjike rajonale. SHUKALB ka kërkuar mbështetje financiare nga iniciativat si Partneriteti i Danubit (D-LeaP) dhe projekti Rrjeti Rajonal për Zhvillimin e Kapaciteteve (RCDN+). Kjo mbështetje mundëson tarifa të ulëta të pjesëmarrjes për shoqëritë UK, duke rikonfirmuar angazhimin e SHUKALB për rritjen dhe zhvillimin e tyre profesional. Programet e ZHK të planifikuara për vitin 2024 përfshijnë:

Trajnim i RCDN mbi Projektet e Investimeve Kapitale të Infrastrukturës në Sektorin e Ujit:

• Datat: 27-29 shkurt dhe 1 mars 2024, në Prishtinë.
• Formati: Një trajnim tre ditor dhe një shkëmbim eksperiencash një ditor.
• Grupi i synuar: Menaxhmenti i mesëm i bashkive dhe i shoqërive UK dhe personeli i njësisë për zbatimin e projekteve.
• Objektivi kryesor: T’i mundësojë pjesëmarrësve të kryejnë projekte komplekse të investimeve në infrastrukturë dhe t’u sigurojë atyre kornizën, njohurinë dhe aftësitë e nevojshme.

Programi D-LeaP Menaxhimi i Aseteve:

• Periudha: Mars 2024 – Shtator 2024 në Tiranë.
• Formati: 3 workshope nga 1 ditë secila dhe asistencë teknike gjatë 7 muajve.
• Grupi i synuar: Menaxhmenti i lartë dhe mesëm, përfshirë administratorët, menaxherët financiarë, menaxherët teknikë dhe inxhinierët.
• Objektivi kryesor: T’i mundësojë pjesëmarrësve të zhvillojnë një Plan Menaxhimi të Aseteve (PMA), duke siguruar operim dhe mirëmbajtje efiçente të aseteve të shoqërisë UK.

.

Programi D-LeaP i Krahasimit të Standardizuar (Benchmarking) – sëbashku me SHUKOS

• Periudha: Mars 2024 – Mars 2025.
• Formati: 2 workshope me nga 1 ditë secila dhe asistencë teknike gjatë 12 muajve.
• Teknologjia: Përdorimi i një platforme për hedhjen e të dhënave dhe analizën e treguesve të performancës së shoqërive, lehtësimi i krahasimeve rajonale dhe globale me shoqëri UK të tjera.
• Grupi i synuar: Departamentet e Planifikimit dhe Raportimit dhe personeli përgjegjës për të dhënat e benchmarking.
• Objektivi kryesor: T’i mundësojë pjesëmarrësve përdorimin e benchmarking si një mjet për përmirësimin e vazhdueshëm, idealisht i integruar në një cikël vjetor planifikimi biznesi dhe si një komunikim i strukturuar i brendshëm dhe i jashtëm për planifikimin e vlerësimit dhe përmirësimit të performancës.

Programi D-LeaP Plani i Sigurisë së Ujit dhe Menaxhimi i Krizave:

• Periudha: Prill – Korrik 2024 në Tiranë.
• Formati: Tre trajnime të përbashkëta një ditore dhe një trajnim 1-ditor në punë, i kombinuar me një vizitë në terren dhe asistencë teknike gjatë një periudhe 4-mujore.
• Grupi i synuar: Administratori / zv.administratori i shoqërive UK, drejtori teknik, inxhinierët dhe personeli i bashkive i Departamentit të Çështjeve Bashkiake.
• Objektivi kryesor: T’i mundësojë pjesëmarrësve identifikimin e rreziqeve operacionale, zhvillimin e planeve të gatishmërisë dhe reagimit për t’ju përgjigjur në mënyrë efiçente incidenteve gjatë krizave ose katastrofave. Përveç kësaj, t’i mundësojë përshtatjen e procedurave të tyre standarde operacionale për t’i udhëzuar në mënyrë efiçente gjatë situatave të krizave të ardhshme.

Programi D-LeaP Akses në Financim:

• Periudha: Qershor – Dhjetor 2024 në Tiranë.
• Formati: Tre shkëmbime eksperiencash të përshtatura për vendimmarrësit dhe dy sesione trajnimi dy ditore sëbashku me një shkëmbim eksperiencash 1 ditor, dhe asistencë teknike gjatë një periudhe 6-mujore.
• Grupi i synuar: Vendimmarrësit e bashkive dhe shoqërive UK (kryetarët e bashkive, këshilltarët bashkiakë, kryetarët e departamenteve financiarë, anëtarët e këshillave mbikqyrëse); dhe menaxhmenti i lartë (kryetarët e departamentit të çështjeve bashkiake, kryetarët e departamentit të planifikimit dhe analizës, kryetarët e departamentit të zhvillimit, specialistë nga departamenti ekonomik dhe financiar, kryetarët e departamentit të kontabilitetit, specialistët financiarë).
• Objektivi kryesor: Të përmirësojë njohuritë dhe aftësitë e pjesëmarrësve në konceptet kryesore të menaxhimit financiar, të rëndësishme për administrimin efektiv të të ardhurave, mbulimin e kostove, praktikat e kontabilitetit, menaxhimin e aseteve, përcaktimin e tarifave, vlerësimin e investimeve dhe aksesin e financimeve.

Programi D-LeaP i Zhvillimit të Kapaciteteve për Ujin e Ndotur:

• Periudha: Nëntor 2024 – Maj 2025 në Tiranë dhe në rajon.
• Formati: Tre trajnime me një total prej 7 ditësh (2 ditor, 3 ditor, 2 ditor) dhe me një shkëmbim eksperiencash një ditor.
• Grupi i synuar: Drejtuesit teknikë, anëtarët e stafit teknik të njësive të zbatimit të projekteve, departamenti i çështjeve bashkiake dhe zyra e kryetarit.
• Objektivi kryesor: Të përmirësojë ndërgjegjësimin e menaxherëve dhe inxhinierëve për të marrë një rol aktiv në fazat e planifikimit dhe zbatimit të projekteve të infrastrukturës së ujërave të ndotura.

Ne inkurajojmë pjesëmarrjen aktive nga të gjitha grupet e interesit në procesin e vlerësimit të nevojave për trajnim për të identifikuar saktë boshllëqet për trajnime. Ne gjithashtu presim në vazhdim regjistrimet e shoqërive UK në programet e ardhshme të zhvillimit të kapaciteteve. Këto programe janë krijuar për të ofruar njohuri dhe aftësi të vlefshme të nevojshme për të adresuar fushat kryesore të performancës dhe nevojat dhe sfidat imediate që dalin nga proceset e vazhdueshme reformuese. Për informacion shtesë mbi këto trajnime dhe programe, ju lutemi kontaktoni menaxheren tonë të trajnimeve në trainim@shukalb.al  dhe vizitoni faqen tonë të internetit KËTU.