SHUKALB nis zhvillimin e programit të D-LeaP “Plani i Sigurisë së Ujit dhe Menaxhimi i Krizave”

Në datat 21 dhe 28 qershor 2024, SHUKALB zhvilloi me sukses dy workshopet e para të trajnimit të programit të D-LeaP Plani i Sigurisë së Ujit dhe Menaxhimi i Krizave. Ky është prezantimi i tretë i këtij programi dhe ofrimi i programit këtë vit mbështetet bashkërisht nga Partneriteti i Danubit (D-LeaP).  si dhe Projekti Rrjeti Rajonal i Zhvillimit të Kapaciteteve (RCDN).

Objektivi kryesor i këtij programi është të rrisë aftësitë e stafit të shoqërive rajonale ujësjellës kanalizime, duke u fokusuar në identifikimin e operacioneve të dëmshme, planifikimin, përgatitjen dhe reagimin e shpejtë ndaj incidenteve dhe rikuperimin nga krizat dhe katastrofat.

Workshopet e trajnimit mblodhën së bashku përfaqësues nga shoqëritë rajonale Ujësjellës Kanalizime Berat, Shkodër, Vlorë, Gjirokastër dhe Elbasan. Workshopet u moderuan nga Pirro Cenko dhe Elton Hasanaj, të dy trajnerë të SHUKALB.

Sesioni i parë i trajnimit: 21 Qershor 2024 – Berat

Sesioni i parë i trajnimit, i mbajtur më 21 qershor në Berat, u fokusua në një pasqyrë të planit të sigurisë së ujit dhe menaxhimit të krizave. Pjesëmarrësit u përfshinë në ushtrime praktike në hartimin e skemës së sistemit (flow-chart), përpilimin e Organigramës së tyre për përgjegjësitë e menaxhimit të crizave, dhe identifikimin dhe analizimin e rreziqeve të ndryshme me të cilat mund të përballen sistemet e tyre të furnizimit me ujë. Pjesëmarrësit fituan njohuri të vlefshme mbi elementët themelorë të sigurisë së ujit dhe menaxhimit të krizave, duke i pajisur ata me aftësitë e nevojshme për të mbrojtur operacionet e tyre.

Sesioni i dytë i trajnimit: 28 Qershor 2024 – Tiranë

Sesioni i dytë i trajnimit u zhvillua më 28 qershor në Tiranë, ku pjesëmarrësit u angazhuan në ushtrime praktike të bazuara në një skenar hipotetik pandemie. Ata u njohën me skenarin e rastit dhe iu caktuan role për të simuluar rreziqet reale në praktikë, kërcënimet dhe çështjet teknike. Për më tepër, pjesëmarrësit punuan në grupe për të identifikuar dhe vlerësuar rreziqet, duke kulmuar në zhvillimin e një plani gjithëpërfshirës të menaxhimit të krizave.

Ky program ilustron angazhimin e SHUKALB për ndërtimin e kapaciteteve dhe rritjen e qëndrueshmërisë së shoqërive ujësjellës kanalizime përballë krizave dhe fatkeqësive të mundshme. Duke pajisur stafin me njohuritë dhe aftësitë e nevojshme, SHUKALB siguron një sektor të ujit më të sigurt dhe më të përgatitur.