SHUKALB dhe Veolia bashkëorganizojnë me sukses Konferencën “Menaxhimi i Sektorit të Ujit, Ndërtimi i Suksesshëm i Kapaciteteve & Mundësitë e Financimit”

SHUKALB është i lumtur të njoftojë organizimin e suksesshëm, në partneritet me Veolia, të konferencës me temë ” Menaxhimi i Sektorit të Ujit, Ndërtimi i Suksesshëm i Kapaciteteve & Mundësitë e Financimit”, mbajtur në Tiranë më 3 Dhjetor 2024. Veolia, anëtari më i ri i SHUKALB nga sektori privat, solli ekspertizën dhe angazhimin e tij për menaxhimin e qëndrueshëm të ujit në këtë event me ndikim.

Konferenca kishte për objektiv të bashkonte aktorët kryesorë nga qeveria, organizatat ndërkombëtare dhe sektori privat për të adresuar sfidat, për të ndarë praktikat më të mira dhe për të eksploruar mundësitë për bashkëpunim. Duke u fokusuar në qeverisjen, ngritjen e kapaciteteve dhe mundësitë financiare, eventi dha njohuri të vlefshme për të mbështetur përshpejtimin e transformimit të sektorit të ujit në Shqipëri.

Eventi mblodhi së bashku rreth 100 përfaqësues nga qeveria qendrore, shoqëritë ujësjellës kanalizime, Enti Rregullator i Ujit (ERRU), Agjencia Kombëtare e Ujësjellës Kanalizimeve (AKUK), Agjencia Kombëtare e Mjedisit, ambasadat, bashkitë, organizatat financiare ndërkombëtare, akademia dhe sektori privat.

Konferenca filloi me fjalimet kryesore të Sh.S. Catherine Suard, Ambasadore e Francës në Shqipëri, Petrit Tare, President i SHUKALB, François Debergh, Drejtor Rajonal i Veolia, Bullgari, Greqi dhe Shqipëri dhe Ardian Islami, Drejtoria e Programeve të Zhvillimit në Fushën e Ujësjellës Kanalizimeve, Ministria e Infrastrukturës dhe Energjisë. Fjalimet e tyre nënvizuan rëndësinë e bashkëpunimit, inovacionit dhe strategjive të qëndrueshme në adresimin e sfidave të sektorit të ujit.

Sesioni i parë i konferencës, i titulluar “Menaxhimi i Sektorit të Ujit”, prezantoi një panel të nderuar folësish, duke përfshirë Klevis Jahaj, Drejtor i Përgjithshëm i AKUK; Sokol Kraja, Drejtor i Drejtorisë Teknike dhe Ekonomike në ERRU; Petrit Tare, Drejtor i Përgjithshëm Shoqerise Rajonale Ujësjellës Kanalizime Korçë; Ondrej Benes, Anëtar Bordi në Shoqatën e Industrisë Çeke për Ujërat dhe Ujërat e Ndotura; dhe Stanislav Stanev, zv. Drejtor Ekzekutiv i Sofiyska Voda.

Ky sesion ofroi prezantime të larmishme dhe të detajuara mbi arritjet, planet dhe sfidat e sektorit, si dhe përmirësimet e kornizës ligjore dhe metodologjive tarifore. Panelistët ndanë praktikat më të mira në menaxhimin eficent të shoqërive ujësjellës kanalizime, eksploruan modelet e qeverisjes nga tregu Çek i ujit dhe paraqitën një rast studimi mbi adresimin e sfidave të ujit në një kryeqytet të BE-së, duke shfaqur zgjidhje inovative nga Sofiyska Voda.  Sesioni përfundoi me një sesion pyetjesh dhe përgjigjesh, duke nxitur diskutime dinamike dhe shkëmbim njohurish midis pjesëmarrësve.

Sesioni i dytë i konferencës, i titulluar “Ndërtimi i Suksesshëm i Kapaciteteve dhe Mundësitë Financiare”, mblodhi së bashku folës të shquar: Elisabeta Poçi, Drejtore Ekzekutive e SHUKALB; Abla Filali Meknassi, Drejtoreshë e Projekteve Ndërfunksionale të Burimeve Njerëzore në Veolia France; Arnaud Dauphin, Drejtor i AFD për Ballkanin Perëndimor; Esra Giresunlu, Drejtoreshë dhe Specialiste e Sektorit të Ujit në BERZH; dhe Lijana Jančauskienė, Inxhiniere e Lartë dhe Këshilltare në Drejtorinë e Projekteve të Bankës Evropiane të Investimeve (BEI).

Sesioni paraqiti prezantime mbi zhvillimin e kapaciteteve dhe bashkëpunimin ndërmjet specialistëve të sektorit, strategjitë për tërheqjen dhe zhvillimin e fuqisë punëtore dhe njohuri mbi mundësitë financiare. Panelistët theksuan mbështetjen e AFD-së për sektorin shqiptar të ujit, rolin e BERZH-it në avancimin e iniciativave sektoriale dhe operacionet e BEI në Ballkanin Perëndimor, duke shfaqur zgjidhje praktike dhe duke nxitur zhvillimin rajonal. Ky sesion ofroi perspektiva të vlefshme për ngritjen e kapaciteteve dhe strategjitë financiare kritike për rritjen dhe qëndrueshmërinë e sektorit.

SHUKALB shpreh mirënjohjen e tij më të thellë ndaj Veolia-s për bashkëpunimin dhe përkushtimin e saj në avancimin e sektorit të ujit në Shqipëri. Si anëtari më i ri i SHUKALB nga sektori privat, Veolia ilustron lidershipin në menaxhimin e qëndrueshëm të ujit dhe inovacionin. Me këtë konferencë të përbashkët, SHUKALB dhe Veolia rikonfirmojnë angazhimin e tyre për të ndërtuar një të ardhme më të qëndrueshme për sektorin e ujit në Shqipëri.

Mësoni më shumë rreth misionit dhe iniciativave të Veolia duke vizituar faqen e tyre të internetit: https://www.veolia.com/en .