SHUKALB zhvillon me sukses Programin e D-LeaP “Akses në Financim “– Forcimi i kapaciteteve për Menaxhimin Financiar në Sektorin e Ujësjellës Kanalizimeve

Përgjatë periudhës janar – prill 2025, SHUKALB zhvilloi për herë të parë Programit të D-LeaP “Akses në Financim”, një iniciativë e rëndësishme e mbështetur nga Partneriteti i Danubit dhe projekti RCDN+. Përmes pesë workshopeve kryesore, programi synonte përmirësimin e aftësive dhe njohurive të pjesëmarrësve në menaxhimin financiar dhe administrimin efektiv të shërbimeve të furnizimit me ujë dhe kanalizimeve.

Në program morën pjesë përfaqësues nga Shoqëritë Rajonale Ujësjellës Kanalizime Shkodër, Gjirokastër, Kukës, Berat, Sarandë, Vlorë dhe Elbasan, si dhe përfaqësues nga Enti Rregullator i Ujit (ERRU) dhe Agjencia Kombëtare e Ujësjellës Kanalizimeve (AKUK). Pjesëmarrësit patën mundësinë të përmirësonin aftësitë e tyre në menaxhimin financiar, të nevojshme për të siguruar qëndrueshmërinë e shërbimeve. Si pjesë e programit, ata hartuan plane veprimi për shoqëritë e tyre, të cilat i prezantuan në workshopin përfundimtar.

Gjatë gjithë seancave, pjesëmarrësit u udhëhoqën nga trajnerët tanë të shquar Monika Vejseli, Valbona Paja dhe Arola Koreshi, të cilët i ndihmuan ata të zbatonin praktikat më të mira në menaxhimin financiar, analizën ekonomike dhe vendimmarrjen për investime strategjike.

Duke pasur parasysh sfidat e vazhdueshme në sektor – si rikuperimi i kostove, përcaktimi i tarifave dhe sigurimi i qëndrueshmërisë financiare afatgjatë – programi ofroi një platformë praktike dhe të përshtatshme në kohë për menaxherët e shoqërive ujësjellës kanalizime, me qëllim thellimin e njohurive të tyre mbi planifikimin financiar dhe procesin e vendimmarrjes.

Zbatimi i suksesshëm i këtij programi shënon një moment kyç në përpjekjet e vazhdueshme të SHUKALB për të mbështetur forcimin e kapaciteteve në sektor. Me mjete të reja, strategji të qarta dhe një rrjet më të fortë profesionistësh, pjesëmarrësit janë tani në një pozitë të favorshme për të nxitur ndryshime dhe për të kontribuar në një të ardhme më të qëndrueshme për shërbimet e furnizimit me ujë dhe kanalizimeve në Shqipëri.