SHUKALB riorganizon me sukses programin e trajnimit të D-LeaP Plani i Sigurisë së Ujit dhe Menaxhimi i Krizave

Më 26 nëntor 2025, SHUKALB zhvilloi me sukses workshopin e parë të Programit Plani i Sigurisë së Ujit dhe Menaxhimi i Krizave, e cila ofrohet me mbështetjen e vlefshme të Partneritetit të Danubit (D-LeaP). Ky workshop shënoi nisjen e një cikli trajnimi katërditor, që synon të forcojë qëndrueshmërinë dhe sigurinë e sistemeve të furnizimit me ujë në mbarë Shqipërinë.

Përfaqësues nga Shoqëritë Rajonale Ujësjellës-Kanalizime Lezhë, Sarandë dhe Korçë morën pjesë në këtë workshop të parë, i cili ndërthuri leksionet teorike me ushtrime praktike. Pjesëmarrësit u njohën me zhvillimin e flow-chart-it të sistemeve të furnizimit me ujë, si dhe me hartimin e organigramave të Planeve të Sigurisë së Ujit (PSU) dhe Planeve të Menaxhimit të Krizave (PMK).

Workshopi përfshiu gjithashtu një analizë SWOT të strukturave aktuale të sistemeve, duke ndihmuar pjesëmarrësit të identifikonin risqet kryesore operacionale. Diskutimet praktike u fokusuan në proceset kritike që ndikojnë sigurinë e ujit dhe përgjigjen efektive ndaj incidenteve.

Nën udhëheqjen e trajnerëve Elton Hasanaj dhe Olta Alla, sesioni orientoi pjesëmarrësit në konceptimin e strukturave të nevojshme për përgatitjen, reagimin dhe rimëkëmbjen në rast incidentesh ose krizash.

Programi adreson sfidat në rritje, si ndotja e shtuar dhe rritja e frekuencës së fatkeqësive natyrore, përfshirë përmbytjet dhe thatësirat, të cilat kërcënojnë aftësinë e shoqërive UK për të ofruar shërbime të qëndrueshme.

Ky workshop i parë krijon bazën për sesionet e ardhshme, të cilat do të përfshijnë rolet në menaxhimin e krizave, planet e përmirësimit dhe monitorimit, vizitat në terren në pika kritike të sistemeve të furnizimit me ujë, si dhe hartimin e plotë të planeve të menaxhimit të krizave dhe sigurisë së ujit.

Kjo shënon zbatimin e tretë të këtij programi të rëndësishëm për shoqëritë ujësjellës kanalizime në Shqipëri. SHUKALB falënderon të gjithë pjesëmarrësit për angazhimin dhe bashkëpunimin në këtë nismë të rëndësishme, e cila kontribuon në shërbime të ujit më të sigurta dhe më të qëndrueshme në Shqipëri.