Menaxhimi i qëndrueshëm i ujit përballë ndryshimeve klimatike: Sukses rekord në Konferencën dhe Ekspozitën e 13-të të Përbashkët Ballkanike

Konferenca dhe Ekspozita e 13-të e Përbashkët Ballkanike,“Menaxhimi i qëndrueshëm i ujit përballë ndryshimeve klimatike“, e organizuar nga SHUKALB dhe SHUKOS më 11–13 nëntor 2025 në Durrës, shënoi një tjetër sukses të rëndësishëm për sektorin e ujit në rajon. Këtë vit, eventi regjistroi një pjesëmarrje rekord prej mbi 500 profesionistësh nga 22 vende, duke mbledhur së bashku përfaqësues të shoqërive ujësjellës-kanalizime, kompanive private, institucioneve akademike, donatorëve dhe institucioneve publike. Atmosfera e konferencës u karakterizua nga energjia pozitive e bashkëpunimit dhe shkëmbimit profesional, duke e kthyer këtë aktivitet në një pikë referimi për zhvillimin e sektorit në Ballkan.

Para hapjes zyrtare, më 11 nëntor, u zhvilluan disa aktivitete para-konferencë: Workshop-i i Programit D-LeaP Benchmarking për Shqipërinë dhe Kosovën, Forumi i Profesionistëve të Rinj të Ujit dhe Workshop-i i Transferimit të Teknologjive u pritën me interes të lartë, duke ofruar hapësira të fokusuara për analiza, shkëmbim përvojash dhe ndërtim kapacitetesh.

Ceremonia e hapjes në mbrëmjen e 11 nëntorit u u moderua nga Elisabeta Poci, Drejtore Ekzekutive e SHUKALB dhe u shoqërua me fjalët përshëndetëse nga presidenti i SHUKALB, Petrit Tare, dhe presidenti i SHUKOS, Arsim Fetahu, të cilët theksuan rëndësinë e bashkëpunimit rajonal në përballjen me sfidat aktuale të sektorit të ujit. Fjalët përshëndetëse që pasuan nga Ministri i Mjedisit të Shqipërisë, SH.T. Sofjan Jaupaj, dhe Ambasadori i Gjermanisë në Shqipëri, SH.T. Karl Bergner, nënvizuan mbështetjen e vazhdueshme të partnerëve institucionalë dhe ndërkombëtarë. Në cilësinë e Sponsorit Platinum, François Debergh nga Veolia solli gjithashtu një mesazh mbështetës për komunitetin profesional të ujit në rajon.

Një moment i veçantë gjatë konferencës ishte ceremonia e ndarjes së çmimeve, e cila nderoi profesionistët që kanë dhënë kontribut të jashtëzakonshëm në sektorin e ujit në Shqipëri dhe Kosovë. Këtë vit, Çmimi i SHUKALB “Bordit të Drejtorëve” iu akordua z. Zef Maçi, Drejtor i Shoqërisë Ujësjellës-Kanalizime Rajoni Lezhë, kontributin e tij të veçantë në sektorin e ujit dhe mbështetjen e palodhur ndaj SHUKALB. Ndërkohë, çmimi “Një jetë në sektorin e ujit” u dha dy profesionistëve me kontribut afatgjatë e të palëkundur: z. Aleks Andoni, Drejtor i Impiantit të Trajtimit të Ujërave të Ndotura pranë Ujësjellës-Kanalizime Rajoni Korçë, dhe znj. Fatmira Ballgjini, Drejtoreshë e Njësisë së Auditit pranë Ujësjellës-Kanalizime Rajoni Durrës, duke nderuar angazhimin e tyre të gjatë në sektor.

Në të njëjtën linjë vlerësimi, SHUKOS nderoi profesionistët e saj përmes çmimeve tradicionale. Çmimi i “Bordit të Drejtorëve” iu dha znj. Ardiana Efendia – Zhuri, nga Zyra e Bashkëpunimit Zviceran në Kosovë, ndërsa çmimi “Një jetë në sektorin e ujit” iu akordua z. Faruk Polloshka, nga Kompania Rajonale e Ujësjellësit “Gjakova”, dhe z. Naim Muja, nga Kompania Rajonale e Ujësjellësit “Prishtina”.

Pas përmbylljes së ceremonisë, u hap zyrtarisht Ekspozita Teknike, ku 27 kompani nga 14 vende prezantuan teknologjitë dhe zgjidhjet më të fundit për sektorin, duke ofruar një hapësirë të pasur për bashkëpunim, partneritete të reja dhe zhvillim të mëtejshëm..

Arbana Kola, Menaxhere e Projekteve të SHUKALB, hapi Programin Teknik të Konferencës më 12 nëntor, duke sjellë në vëmendje aktivitetet para-konferencë, duke prezantuar programin e ditës dhe duke njohur partnerët sponsorë të konferencës së këtij viti. Konferenca më pas vazhdoi me një fjalim kryesor nga një i ftuar special, Prof. Kala Vairavamoorthy, Drejtor Ekzekutiv, Shoqata Ndërkombëtare e Ujit (IWA), me temën “ Sisteme në Transformim – Inovacion për një të Ardhme të Qëndrueshme të Ujit “.

Gjatë ditës u zhvilluan dy sesione plenare mjaft dinamike. I pari, “Menaxhimi i Ujit: Rritja e Qëndrueshmërisë ndaj një Klime në Ndryshim”, solli perspektiva të rëndësishme mbi ndikimin e ndryshimeve klimatike te sektorët ujësjellës-kanalizime dhe te burimet ujore. Ndërsa sesioni i dytë, “Përshtatja e Sektorit të Ujit me Direktivat e BE-së: Nga Politikat në Zbatim”, u fokusua te sfidat dhe mundësitë e harmonizimit me standardet evropiane, duke shpalosur eksperienca konkrete nga Shqipëria, Kosova, Maqedonia e Veriut dhe partnerët ndërkombëtarë.

Sesione të shumta paralele e vijuan programin teknik të datës 12 nëntor, duke trajtuar tematika që varionin nga menaxhimi teknik i kompanive të ujit, ndikimi i ndryshimeve klimatike, menaxhimi i burimeve ujore, qasjet institucionale dhe financiare, deri te praktikat e avancuara të operimit dhe mirëmbajtjes.

Dita e dytë e konferencës, më 13 nëntor, u hap nga Abdullah Dërguti, Drejtor Ekzekutiv i SHUKOS, e ndjekur nga fjala përshëndetëse e Sh.S. Catherine Suard, Ambasadore e Francës në Shqipëri, e cila theksoi rëndësinë e bashkëpunimit ndërkombëtar për rritjen e qëndrueshmërisë në sektorin e ujit. Më pas, Konferenca vazhdoi me fjalimin e dytë kryesor nga Philippe Reymond, Menaxher Projekti, Instituti Federal Zviceran i Shkencës dhe Teknologjisë Ujore, Zvicër  i cili mbajti prezantimin me titull “Nga zonat bregdetare në ato sensitive mjedisore dhe

periferike: Mundësitë dhe sfidat e menaxhimit të decentralizuar të ujërave të ndotura”.

Sesioni i tretë dhe i fundit plenar, i dedikuar sanitetit dhe menaxhimit të ujërave të ndotura, solli diskutime të thelluara mbi rrugët drejt qëndrueshmërisë në një sektor që po përballet me sfida të vazhdueshme teknike dhe mjedisore. Në vijim, Drejtori i Përgjithshëm i AKUK, Flauers Shoshi, mbajti një fjalë përshëndetëse për pjesëmarrësit, përpara se konferenca të vijonte me sesionet e saj finale teknike.

Ekspozita Teknike vijoi gjatë dy ditëve të konferencës, duke ofruar për pjesëmarrësit mundësinë të njihnin nga afër inovacione të reja, pajisje inteligjente, matëse, pompa, zgjidhje softuerike dhe teknologji që ndikojnë në modernizimin e sektorit.

Në vijim, kemi kënaqësinë të ndajmë prezantimet e bëra gjatë dy ditëve të konferencës, së bashku me fotot e eventit. Ju lutemi klikoni në linqet e mëposhtme për të parë dhe shkarkuar materialet:

• Prezantimet
• Fotot e Konferencës dhe Ekspozitës