Përmbytjet e janarit 2026 në Durrës: Ujësjellës Kanalizime Rajoni Durrës përmbylli me sukses ndërhyrjet dhe riktheu normalitetin

Reshjet e dendura të fillim-janarit shkaktuan përmbytje në disa zona të qytetit dhe rrethinave të Durrësit, duke krijuar vështirësi për banorët dhe duke vënë në provë infrastrukturën e kanalizimeve. Pas situatës së krijuar nga reshjet intensive të datës 6 janar, Shoqëria Rajonale Ujësjellës Kanalizime Durrës (SHRUKD) reagoi menjëherë, duke u angazhuar në terren me forca të shumta punonjësish dhe mjete.

Ekipet e kanalizimeve ndërhynë në pastrimin e kolektorëve, zhbllokimin e pusetave dhe rrjeteve të kanalizimeve, si dhe në menaxhimin e prurjeve të shtuara të ujit, me synim minimizimin e pasojave dhe garantimin e sigurisë për qytetarët. Paralelisht, SHRUKD u gjend pranë banorëve të prekur, duke ofruar ndihmë direkte në banesa për largimin e ujit, verifikimin e rrjeteve të brendshme dhe mbështetje teknike.

Ndër zonat më të prekura ishin ish-Këneta në qytetin e Durrësit, si dhe njësitë administrative Sukth, Katund i Ri, Vadardhë dhe Kullë. Në këto zona, disa grupe të SHRUKD u shpërndanë njëkohësisht, në bashkëpunim të ngushtë me Bashkinë Durrës, Emergjencat Civile dhe Policinë e Shtetit. Në kuadër të këtij bashkëpunimi, ekipet morën pjesë edhe në evakuimin e banorëve, duke garantuar sigurinë e familjeve të rrezikuara.

Gjatë ndërhyrjeve, punonjësit dhe mjetet e SHRUKD kryen thithjen e ujit nga banesa, garazhe, ambiente sociale dhe arsimore, hapjen e kanaleve dhe pusetave të bllokuara nga aluvionet dhe inertet, si dhe largimin e ujit me pompa dhe mjete të rënda aty ku ishte e nevojshme. Angazhimi intensiv i ekipeve bëri të mundur stabilizimin e situatës dhe rikthimin gradual të normalitetit në zonat e prekura.

Falë reagimit të menjëhershëm, përkushtimit dhe punës së pandërprerë të punonjësve të sektorit të kanalizimeve dhe mirëmbajtjes, situata e krijuar nga përmbytjet u menaxhua me sukses dhe shërbimet u rikthyen në funksionim normal. SHRUKD ka shprehur mirënjohje për të gjithë punonjësit dhe strukturat e përfshira, duke vlerësuar profesionalizmin dhe përgjegjësinë e treguar në këto ditë të vështira.

SHRUKD thekson se përvoja e kësaj situate ka riafirmuar rëndësinë e reagimit të shpejtë dhe bashkëpunimit ndërinstitucional, duke mbetur e angazhuar në shërbim të komunitetit dhe pranë qytetarëve në çdo situatë emergjente.