SHUKALB finalizon dhënien e ciklit të katërt të programit të trajnimit të D-LeaP Plani i Sigurisë së Ujit dhe Menaxhimi i Krizave

SHUKALB ka përmbyllur me sukses dhënien e ciklin të katërt të programit të trajnimit të D-LeaP Plani i Sigurisë së Ujit dhe Menaxhimi i Krizave, zhvilluar gjatë muajve nëntor–dhjetor 2025. Ofrimi i këtij programi u bë i mundur me mbështetjen e vlefshme të Partneritetit të Danubit (D-LeaP).

Objektivi i përgjithshëm i programit është t’u mundësojë shoqërive ujësjellës kanalizime të identifikojnë rreziqet e dëmshme operacionale, të planifikojnë dhe përgatiten, të reagojnë shpejt ndaj incidenteve dhe të rimëkëmben në mënyrë efektive në situata krizash ose fatkeqësish.

Programi u ndoq nga përfaqësues të Shoqërive Rajonale Ujësjellës Kanalizime Lezhë, Sarandë dhe Korçë. Nën drejtimin e trajnerëve Elton Hasanaj dhe Olta Alla, pjesëmarrësit punuan mbi strukturimin dhe analizimin e sistemeve të tyre. Faza e parë u përqendrua tek ndërtimi i “flow-chart”-eve dhe organigramave të Planit të Sigurisë së Ujit dhe të Planit të Menaxhimit të Krizave, si edhe identifikimi i risqeve kryesore.

Më tej, pjesëmarrësit testuan rolet institucionale përmes skenarëve simulues, duke mësuar të vlerësonin situata dhe të merrnin vendime nën presion. Pas trajnimeve në klasë, u zhvilluan vizita në terren në secilën prej shoqërive pjesëmarrëse, ku analizat e rrezikut u verifikuan në pikat kritike të sistemit.

Faza finale e programit solli prezantimin e drafteve të Planit të Sigurisë së Ujit, skemave të sistemeve në Google Earth dhe organigramave të Menaxhimit të Krizave. Përmes një skenari të simuluar përmbytjesh, pjesëmarrësit u trajnuan në rolin e Menaxherit të Krizave dhe përdorimin e një kuadri të strukturuar vendimmarrës 60-minutësh

Aktualisht, shoqëritë UK pjesëmarrëse kanë hyrë në fazën e miratimit administrativ të dokumenteve, me synimin që këto draft plane të shndërrohen në Procedura Standarde Operimi. Kështu, trajnimi nuk mbetet teori, por shndërrohet në instrument praktik për sigurinë e furnizimit me ujë dhe forcimin e qëndrueshmërisë së sektorit.

Ky proces përfaqëson një investim të rëndësishëm në profesionalizmin e shoqërive UK dhe në mbrojtjen e komuniteteve që varen nga to. SHUKALB falënderon pjesëmarrësit, trajnerët dhe partnerët për angazhimin dhe bashkëpunimin.