ERRU prezanton Modelin Standard të Planit të Biznesit – Një hap i ri drejt qëndrueshmërisë dhe performancës në sektorin e ujit

Në 5 shkurt, në Tiranë, Enti Rregullator i Ujit zhvilloi Takimin Koordinues për zbatimin e Modelit Standard të Planit të Biznesit në sektorin ujësjellës-kanalizime, një iniciativë e udhëhequr nga ERRU, në bashkëpunim me Bankën Botërore, SECO dhe Agjencinë Kombëtare të Ujësjellës-Kanalizimeve (AKUK). Në takimim morë pjesë drejtues institucionesh, partnerë ndërkombëtarë, përfaqësues të shoqërive rajonale UK, si dhe SHUKALB, me fokus forcimin e bashkëpunimit institucional dhe krijimin e një qasjeje të unifikuar për planifikimin dhe zhvillimin e sektorit.

Në qendër të diskutimeve ishte Plani i Biznesit 5-vjeçar, i hartuar nga ERRU me asistencën e Bankës Botërore, i cili përfaqëson një hap të rëndësishëm drejt modernizimit të sektorit. Modeli standard synon të harmonizojë planifikimin teknik dhe financiar, të lidhë investimet me kapacitetin real financiar të shoqërive dhe me procesin tarifor, si dhe të vendosë një strukturë të përbashkët për të gjitha shoqëritë rajonale. Kjo qasje adreson sfidat aktuale të sektorit, si nivelet e ndryshme të performancës, planifikimi i fragmentuar vjetor dhe vështirësitë në zbatimin e metodologjisë tarifore.

Modeli parashikon një periudhë rregullatore 5-vjeçare, gjatë së cilës do të aplikohet monitorimi i vazhdueshëm “plan kundrejt realizimit”, duke forcuar përgjegjshmërinë menaxheriale dhe analizën rregullatore. Ai synon rritjen e qëndrueshmërisë financiare përmes mbulimit të kostove dhe parashikimit të flukseve financiare, prioritizimin e investimeve të domosdoshme, vendosjen e treguesve të matshëm të performancës dhe rritjen e transparencës dhe krahasueshmërisë sektoriale.

Plani i Biznesit është gjithashtu dokument thelbësor për zbatimin e metodës tarifore “Çmim Tavan”, duke garantuar që aplikimet për tarifa të bazohen në projeksione reale, objektiva të qarta dhe monitorim të performancës. Përmes këtij instrumenti, synohet të forcohet vendimmarrja e bazuar në evidencë për ERRU, AKUK dhe aktorët e tjerë të sektorit, si dhe të krijohet një bazë më e qëndrueshme për orientimin e investimeve dhe përmirësimin e cilësisë së shërbimit ndaj qytetarëve.

Zbatimi progresiv i modelit, përmirësimi i cilësisë së të dhënave dhe forcimi i kapaciteteve institucionale u theksuan si hapa të domosdoshëm në vijim, në funksion të një sektori më të qëndrueshëm, më transparent dhe më performues.