SHUKALB i bashkohet Projektit Ndërkufitar Interreg për Reduktimin e Humbjeve të Ujit

SHUKALB është pjesë e projektit SDSLeaD – Smart Decision Support and Leakage Detection (Mbështetja e Vendimeve të Zgjuara dhe Zbulimi i Rrjedhjeve), një iniciativë e re ndërkufitare mes Shqipërisë dhe Greqisë që synon të adresojë rrjedhjet e ujit dhe të reduktojë Ujin Pa të Ardhura (NRW) në rajon. Projekti zbatohet në kuadër të Programit të Bashkëpunimit Ndërkufitar Interreg VI-A IPA Greqi–Shqipëri dhe do të zhvillohet nga tetori 2025 deri në tetor 2027.

Shoqëritë Ujësjellës Kanalizime në të dy vendet përballen me sfida të ngjashme, si infrastruktura e amortizuar, zbulimi i vonuar i rrjedhjeve, mungesa e monitorimit në kohë reale dhe presioni në rritje mbi burimet ujore për shkak të ndotjes, mbishfrytëzimit dhe ndryshimeve klimatike. Këto sfida shpesh rezultojnë në humbje të konsiderueshme të ujit dhe energjisë, rritje të kostove operative dhe ndikime negative mjedisore.

Për t’iu përgjigjur këtyre sfidave, projekti SDSLeaD do të zhvillojë dhe pilotojë një Sistem të Avancuar të Mbështetjes së Vendimmarrjes (DSS), i cili kombinon teknologji inovative si sensorë IoT, të dhëna SCADA, modele simulimi hidraulik dhe binjakë dixhitalë. Përmes analizës parashikuese dhe monitorimit në kohë reale, sistemi do të ndihmojë shoqëritë UK të identifikojnë rrjedhjet më herët, të reagojnë më shpejt dhe të menaxhojnë rrjetet në mënyrë më efikase.

Sistemi do të pilotohet në Kozan (Greqi) dhe në Korçë (Shqipëri), i mbështetur nga instalimi i pajisjeve inteligjente të monitorimit, përfshirë regjistrues të të dhënave, sensorë presioni, matës inteligjentë dhe pajisje për monitorimin e rrjedhjeve.

Përveç zgjidhjeve teknologjike, projekti do të fokusohet edhe në forcimin e kapaciteteve të shoqërive UK përmes trajnimeve, workshopeve dhe zhvillimit të udhëzimeve teknike, si dhe mjeteve për ndarjen e njohurive. Gjithashtu, do të hartohet një plan i përbashkët veprimi dhe rekomandime për të mbështetur zbatimin afatgjatë të praktikave të përmirësuara në menaxhimin e rrjedhjeve.

Projekti drejtohet nga Kompania Bashkiake e Ujësjellësit dhe Kanalizimeve të Kozanit (DEYAK) dhe zbatohet në partneritet me Sekretariatin e Përgjithshëm të Mjedisit Natyror dhe Ujit të Greqisë, Shoqërinë Rajonale Ujësjellës Kanalizime Korçë dhe SHUKALB.

Në kuadër të projektit, SHUKALB do të luajë një rol kyç në ndërtimin e kapaciteteve dhe transferimin e njohurive, duke mbështetur aktivitetet trajnuese për shoqëritë UK, duke kontribuar në mbledhjen dhe analizën e të dhënave mbi humbjet e ujit, si dhe duke shpërndarë rezultatet e projektit përmes rrjetit të saj kombëtar të shoqërive UK.

Duke kombinuar inovacionin, dixhitalizimin dhe bashkëpunimin ndërkufitar, projekti SDSLeaD synon të përmirësojë efikasitetin dhe qëndrueshmërinë e sektorit të ujit në rajon, duke kontribuar njëkohësisht në arritjen e objektivave të Direktivës së BE-së për Ujin e Pijshëm, Direktivës Kornizë për Ujin, Marrëveshjes së Gjelbër Evropiane dhe Objektivit 6 të Zhvillimit të Qëndrueshëm – Ujë i Pastër dhe Sanitet.