Webinari “Raportimi Financiar dhe Fiskal për Shoqëritë Ujësjellës Kanalizime – Sfidat dhe Zgjidhjet”- i përgjigjet nevojave të Shoqërive Ujësjellës Kanalizime

Me datë 28 maj 2021, SHUKALB zhvilloi me sukses webinarin me temë “Raportimi Financiar dhe Fiskal për Shoqëritë Ujësjellës Kanalizime – Sfidat dhe Zgjidhjet”. Webinari arriti të informojë përfaqësuesit e shoqërive ujësjellës kanalizime mbi raportimin financiar dhe fiskal, si dhe të diskutojë mbi sfidat me të cilat përballen dhe zgjidhjet e problemeve aktuale në fushën e raportimit financiar dhe fiskal.

Në webinar morën pjesë 33 menaxherë dhe specialistë që punojnë pranë departamenteve tregtare dhe financiare të shoqërive ujësjellës kanalizime Shkodër, Lezhë, Korçë, Vlorë, Berat-Kuçovë, Tiranë, Gjirokastër, Kamëz, Pogradec, Krujë, Lushnjë, Maliq, Malësi e Madhe, Mat, Mirditë, Peqin, Pukë, Klos dhe Cërrik.

Webinari u drejtua nga Prof. Dr. Sotiraq Dhamo, Lektor, Departamenti i Kontabilitetit, Fakulteti i Ekonomisë, Universiteti i Tiranës.

Webinari siguroi prezantime që mbulonin tema kryesore financiare dhe fiskale në lidhje me çështjet legjislative, rregullatore dhe tatimore, duke e vënë theksin te kërkesat specifike sipas standardeve kombëtare dhe ndërkombëtare të raportimit financiar, tatimin mbi fitimin, shpenzimet e panjohura me TVSH dhe tema të tjera specifike që lidhen me veprimtarinë e shoqërive ujësjellës kanalizime.

Në vazhdim, diskutimi dhe pyetjet dhe përgjigjet u ndërthurën me njëra tjetrën, gjatë së cilës, pjesëmarrësit kërkuan dhe morën zgjidhje për vështirësitë e hasura në punën e tyre. Disa nga çështjet e theksuara nga pjesëmarrësit ishin provigjonimi i të drejtave të arkëtueshme, rivlerësimi i aktiveve afatgjata dhe shlyerja e borxhit etj. Reagimet e marra nga pjesëmarrësit në fund të webinarit ishin shumë pozitive duke cituar “Webinari është shumë i vlefshëm dhe efektiv për punën tonë dhe është nevoja për të patur më shumë evente mbi tema të tilla “.