SHUKALB dhe SHUKOS organizojnë me sukses Konferencën dhe Ekspozitën e 9-të të Përbashkët Ballkanike 2021, “Vlera e ujit”

Më 3, 4,5 nëntor 2021, SHUKALB në bashkëpunim me SHUKOS (Shoqata e Ujësjellësve dhe Kanalizimit të Kosovës) organizuan Konferencën dhe Ekspozitën e 9-të të Përbashkët Ballkanike, me temë “Vlera e Ujit”, të mbajtur si një event virtual përmes platformës Zoom. Konferenca virtuale tërhoqi mbi 200 profesionistë të ujit që përfaqësonin shoqëri UK, komunitetin e donatorëve, kompani private, institucione akademike, si dhe institucione të tjera të qeverisjes qendrore dhe lokale nga 14 vende të ndryshme.

Programi Teknik i Konferencës përbëhej nga 12 sesione me tematika të ndryshme të organizuara në 9 Sesione të ndryshme Teknike dhe 3 Sesione Plenare, me mbi 33 prezantime.  Ishin 68 moderatorë dhe folës, të cilët përmes prezantimeve dhe diskutimeve të tyre na treguan praktikat më të mira që përdoren bashke me sfidat dhe mundesite qe ekzistojne ne sektorin e ujit.

Eventi tre-ditor filloi në 3 nëntor, me fjalimin përshëndetës për të gjithë pjesëmarrësit nga Kryetari i SHUKOS, Agron Tigani. Në fjalën e tij, ndër të tjera, z. Tigani përshëndeti donatorët e huaj si Bankën Gjermane për Zhvillim KfW, Zyrën Zvicerane për Bashkëpunim dhe USAID, ku me ndihmën e tyre dhe të Qeverisë së Kosovës jane implementuar shumë projekte, ku vlen te theksohet dhe investimet e fundit që janë bërë në Prizren, Gjakovë dhe Pejë, për ndërtimin e Impianteve të trajtimit të ujërave të zeza. “Trajtimi i ujërave të zeza është një nga kriteret për t’u anëtarësuar në BE, pra të gjitha rjedhat e lumenjve duhet të mbrohen ndaj ndotjeve nga faktori njeri” – tha z. Tigani.

Dita e parë e Konferencës vazhdoi me fjalën përshëndetëse nga SH.T.Z Albin Kurti, Kryeministër, Qeveria e Republikës së Kosovës. Në fjalën e tij, ndër të tjera, SH.T.Z. Albin Kurti tha: “Siguria e ujit është dhe mbetet jetike për zhvillimin tonë socio-ekonomik, sigurinë ushqimore, shëndetin dhe ekosistemet tona. Vendi ynë nuk mund të jetë imun ndaj krizës mjedisore, prandaj është e domosdoshme t’i mbrojmë dhe sigurojmë menaxhimin e mirë të burimeve tona ujore, të ndërtojmë akumulime të reja dhe të sigurojmë ujë për zhvillim ekonomik për brezat e ardhshëm”.

Konferenca vazhdoi me fjalimin e parë kryesor nga Oliver Loebel, Sekretar i Përgjithshëm, Federata Evropiane e Shoqatave Kombëtare për Shërbimet e Ujit, Belgjikë, i cili ndau një prezantim me temën “Vlerësimi i Ujit tonë – Një Parakusht për Shërbime të Qëndrueshme të Ujit”. Duke folur për vlerën e ujit, z. Loebel u shpreh: “Aty ku uji ka çmim, që do të thotë se konsumatorët tarifohen për përdorimin e tij, çmimi pasqyron përpjekjet për mbulimin e kostos dhe jo vlerën e ofruar”.

Fjalimi i dytë kryesor u mbajt nga Camilo Lombana Cordoba, Specialist i Lartë për Furnizimin me Ujë dhe Kanalizimet, Banka Botërore. Në fjalën e tij, z. Cordoba u shpreh: “Shoqëritë UK po luajnë një rol kyç në sigurimin e shërbimeve të sigurta, të besueshme dhe të qëndrueshme të furnizimit me ujë dhe kanalizimeve. Megjithatë, shumë prej tyre nuk janë të gatshëm të përballen me sfidat që kanë përpara, kështu që problemi që shohim është se shoqëritë përballen me disa sfida në përmbushjen e detyrës së tyre kryesore për sigurimin e ujit të sigurt dhe kanalizimeve për përdoruesit e tjerë. Kjo përfshin pengesa, të tilla si pamundësia për t’i ofruar shërbim një popullsie që vazhdon të rritet, sfidat në rikuperimin e kostos operacionale dhe pamundësia për t’u rikuperuar nga goditjet dhe streset e jashtme, siç po shohim këto ditë me COVID- 19 ku disa shoqëri po luftojnë ende për t’u rikuperuar nga pandemia”.

Pas mbajtjes së fjalimeve kryesore, Konferenca vazhdoi me sesionin e parë plenar të programit, kushtuar temës së përgjithshme të konferencës “Vlera e Ujit: Një Vështrim i Përgjithshëm”. Sesioni u moderua nga Ndriçim Shani, Enti Rregullator i Ujit, Shqipëri dhe panelistët që iu bashkuan diskutimeve ishin Hajrije Morina, Drejtor, Autoriteti Rregullator për Shërbimet e Ujit, Kosovë; Sokol Xhafa, UD/Kryeshef Ekzekutiv, Kompania Rajonale e Ujësjellësit Prishtinë, Kosovë; Zef Maçi, Administrator, Shoqëria Ujësjellës Kanalizime Lezhë, Shqipëri; Dr. Gabriele Lames, Menaxhere Programi, Orientimi i Shërbimeve të Furnizimit me Ujë dhe Kanalizime drejt Performancës dhe Konsumatorit, GIZ, Shqipëri; Altin Hazizaj, Konsulent i Lartë për Marrëdhëniet me Publikun dhe Shërbimet ndaj Klientit, Programi i Ujësjellësave Ruralë III, Shqipëri

Në vijim të sesionit të parë plenar, programi vazhdoi me 3 (tre) sesione teknike, “Menaxhimi i Burimeve Ujore”, “Kuadri Rregullator” dhe “Organizimi dhe Menaxhimi i Shoqërive Ujësjellës Kanalizime”.

Dita e dytë e Konferencës, 4 Nëntor, filloi me një fjalë përshëndetëse për të gjithë pjesëmarrësit nga Presidenti i SHUKALB, Petrit Tare. Në fjalën e tij, ndër të tjera, z.Tare tha: “Rëndësia e ujit është vlera e tij në natyrë, por përsa i përket shoqërive të ujësjellës kanalizime, kjo vlerë duhet të kthehet në atë kontekst që ne t’i vijmë afër konsumatorit. Duhet t’i mbrojmë burimet ujore, por që edhe konsumatori të kuptojë që uji ka kosto”.

Pas fjalës së z. Tare, Konferenca vazhdoi me fjalën përshëndetëse të Mentor Arifaj, Zëvendësministër i Ministrisë së Ekonomisë, Kosovë. Në fjalën e tij, ndër të tjera, z. Arifaj u shpreh: “Duke pasur shkas nga fakti se Kosova është një vend i cili ka resourse të kufizuara të ujit dhe duke qenë të vetëdijshëm për efektet e ndryshimeve klimatike, një nga prioritetet tona do të jetë zvogëlimi i humbjeve”.

Sesioni i dytë Plenar, “Ndërtimi i Shoqërive Ujësjellës Kanalizime të së Ardhmes: Të Kuptojmë Udhëtimin Përpara” u moderua nga Baton Begolli, Këshilli Ndërministror për Ujërat, Zyra e Kryeministrit, Kosovë. Për të diskutuar për këtë temë, panelistët e ftuar ishin Patricia Lopez, Specialiste e Lartë për Financat dhe Infrastrukturën, Banka Botërore, Shtetet e Bashkuara të Amerikës; Flauers Shoshi, Zv. Drejtor i Përgjithshëm, Agjencia e Ujësjellës, Kanalizimeve dhe Infrastrukturës së Mbetjeve, Shqipëri; Petrit Tare, Administrator, Shoqëria Ujësjellës Kanalizime Korçë, Shqipëri; Elisabeta Poçi, Drejtore Ekzekutive, SHUKALB; Tamás Bencze, Drejtor për Zhvillimin e Biznesit Ndërkombëtar, Kompania e Ujit të Budapestit, Hungari.

Programi i ditës së dytë vazhdoi me sesionet teknike me titull “Menaxhimi i Krizave”, “Menaxhimi i Operimit Teknik të Shoqërive Ujësjellës Kanalizime I” dhe “Menaxhimi iOperimit Teknik të Shoqërive Ujësjellës Kanalizime II”.

Dita e tretë e Konferencës, 5 nëntor, u hap me fjalën përshëndetëse të Liburn Aliut, Ministër i Mjedisit, Planifikimit Hapësinor dhe Infrastrukturës, Kosovë.

Në fjalën e tij z. Aliu tha: “Një nga prioritetet tona gjatë viteve në vijim është që të arrijmë të sigurojmë ujë për pije por dhe për ujitje. Nga ana tjetër, këto ujërat tona që dalin, shpesh ndotin dhe ambjentet përreth dhe trajtimi i ujërave të zeza është prapë pjesë e synimeve tona, në mënyrë që ujin në vendet fqinje ta lëshojmë sa më të pastër të mundshme”.

Konferenca vazhdoi me Sesionin e 3-të Plenar “Menaxhimi i Infrastrukturës Ujësjellës Kanalizime në Kontekstin e Integrimit në BE”, moderuar nga Jovan Gjika, Agjencia Kombëtare e Ujësjellës, Kanalizimeve dhe Infrastrukturës së Mbetjeve, Shqipëri. Panelistët e ftuar ishin Stuart Brown, Drejtues Ekipi, Projekti i Negociatave të Ujit dhe Mbështetjes së Planifikimit të Investimeve, Shqipëri; Baton Begolli, Këshilltar për Politikat e Ujit, Këshilli Ndërministror i Ujërave, Zyra e Kryeministrit, Kosovë; Agron Haxhimali, Drejtor Ekzekutiv, Shoqata e Bashkive, Shqipëri; Adelina Farrici, Drejtore Ekzekutive, Shoqata për Autonominë Vendore, Shqipëri; Aida Moranjkic, Menaxhere e Produktit të Zhvillimit të Kapaciteteve, AQUASAN Network, Bosnja dhe Hercegovina.

Programi i Konferencës vazhdoi me tre sesionet teknike të fundit me temë “Menaxhimi i Shërbimeve të Furnizimit me Ujë dhe Kanalizimeve”; “Menaxhimi i Ujit të Ndotur” dhe “Zgjidhjet Inovative”.

Ekspozita Teknike Virtuale

Pjesëmarrësit në Konferencë patën mundësinë të vizitonin Ekspozitën e parë Virtuale të organizuar përmes një platforme virtuale ku kompanitë ekspozuese prezantuan produktet dhe shërbimet e tyre përmes videove, imazheve, broshurave dhe informacioneve të tjera të rëndësishme. Gjithashtu, pjesëmarrësit patën mundësinë të takohen dhe të ndërveprojnë virtualisht me përfaqësuesit e kompanive ekspozuese. Pesë kompani ekspozuese iu bashkuan ekspozitës sonë këtë vit Budapest Waterworks, Konti Hidroplast; Valvotubi Ind. Srl, GF Piping Systems and Altereo, të cilët ishin edhe sponsorë të këtij eventi.

Pas konferencës, si një event anësor, u organizua Forumi i Profesionistëve të Rinj të Ujit, me teme “Profesionistët e Rinj të Ujit, Përgjegjës të Ardhshëm për Sektorin e Ujit”. Objektivi i forumit ishte të siguronte një platformë shkëmbimi dhe networking për të rinjtë, studentët ose të diplomuarit në hapat e parë të karrierës së tyre, me qëllim që t’i motivonte ata të qëndronin dhe të zhvillonin një karrierë në sektorin e ujit.

Forumi tërhoqi rreth 50 profesionistë të rinj të ujit nga Shqipëria dhe Kosova, të cilët përfaqësonin jo vetëm studentë, por edhe profesionistë të angazhuar në pozicione të ndryshme në shoqëritë UK, si dhe në institucione të tjera të lidhura me ujin.

SHUKALB dhe SHUKOS dëshirojnë të falënderojnë organizatat dhe kompanitë që mbështetën organizimin e Konferencës dhe Ekspozitës së 9-të të Përbashkët Ballkanike, Rrjeti Rajonal për Zhvillimin e Kapaciteteve (RCDN) për Shërbimet e Ujit dhe Kanalizimeve, Budapest Waterworks, Konti Hidroplast, Valvotubi Ind. Srl, GF Piping Systems dhe Altereo.

Ne do të dëshironim të ndanim me ju Prezantimet e paraqitura gjatë tre ditëve të konferencës, si dhe disa nga fotot e aktivitetit.  Ju lutemi klikoni në linqet e mëposhtme për të parë materialet:

• Prezantimet
• Fotot e Konferencës dhe Ekspozitës