SHUKALB organizon takimin e Palëve të Interesit mbi Letrën e Pozicionimit me temë “Përmirësimi i kornizës rregullatore për menaxhimin e aseteve (AM) në nivel vendor”

Në datë 17 Shkurt 2022, SHUKALB organizoi një takim virtual mbi mbi Letrën e Pozicionimit me temë “Përmirësimi i kornizës rregullatore për menaxhimin e aseteve (AM) në nivel vendor”, me pjesëmarrjen e aktorëve kryesorë të sektorit të ujit në Shqipëri. Takimi i palëve të interesit u organizua në kuadër të projektit “Rrjeti Rajonal i Zhvillimit të Kapaciteteve për Furnizimin me Ujë dhe Kanalizimet (RCDN)”.

Në takim morën pjesë përfaqësues nga shoqëritë UK anëtare të SHUKALB, përfaqësues nga Enti Rregullator i Ujit (ERRU), Agjencia Kombëtare e Ujësjellës-Kanalizime dhe Infrastrukturës së Mbetjeve (AKUM), Shoqata e Bashkive të Shqipërisë, Shoqata për Autonomi Vendore, si dhe RCDN – GIZ ORF MMS. Takimi u moderua nga Mihallaq Qirjo, Drejtor i Qendrës Burimore të Mjedisit, Shqipëri.

Takimi lehtësoi dialogun midis palëve të interesit mbi letrën e pozicionimit të hartuar, u prezantuan rekomandimet dhe rolet institucionale të ERRU dhe AKUM mbi Menaxhimin e Aseteve, veprimet e ardhshme për advokimin e Menaxhimit të Integruar të Aseteve dhe mblodhi komentet e pjesërmarrësve mbi pozicionet e mbajtura.

Mesazhi i letrës së pozicionimit është “Menaxhimi i Integruar i Aseteve mbetet një prej pikave të dobëta në sektorin e ujësjellës kanalizimeve, ende i pa adresuar në mënyrë të drejtpërdrejtë.  Standardizimi i tij përmes përmirësimit të kuadrit rregullator do të sjellë përmirësimin e performancës së këtyre shoqërive dhe cilësinë e të dhënave të grumbulluara në nivelin qendror për të planifikuar drejt shpërndarjen e subvencioneve dhe mbështetjen me investime kapitale. Ndërhyrje të nevojshme vlerësohen mbështetja në planifikimin prej Shoqërive UK për menaxhimin e aseteve dhe ngritja e kapaciteteve njerëzore dhe teknologjike për këtë proces. Përvoja e SHUKALB në fushën e menaxhimit të aseteve do të mundësojë që Shoqëritë UK të përfshijnë dhe përdorin teknologjitë e përparuara të informacionit të cilat ndihmojnë në përmirësimin e performancës në nivelin e shoqërive dhe cilësinë e të dhënave të grumbulluara prej institucioneve në nivel qendror”.

SHUKALB do të dorëzojë së afërmi draftin final të Letrës së Pozicionimit tek dy institucionet kryesore qendrore, ERRU dhe AKUM, si dhe do ta shpërndajë tek të gjithë palët e interest nëpërmjet kanaleve të ndryshme të komunikimit.