SHUKALB përfundon programin Rotary “Hands Across Waters” me Eventin Vjetor Ndërkombëtar të Diplomimit në Ditën Botërore të Ujit, 22 Mars

Për të dytin vit radhazi, SHUKALB ka bashkuar përpjekjet me Rotary Club të Haifa-s në Izrael, Hi-Teach dhe Rotary Club të Tirana International për organizimin e programit arsimor inovativ STEAM Rotary Hands Across Waters (RHAW) për shkollat e mesme në Shqipëri. Programi RHAW përdor sfidën globale të Ujit dhe Kanalizimeve dhe zgjidhje të reja të avancuara si bazë për edukimin bashkëpunues të shkencës ndërkulturore. Është zhvilluar nga Hi-Teach dhe drejtohet në bashkëpunim me Rotary, i pritur nga Haifa Rotary Club dhe shumë Klube Rotariane, Industri, Qeveri, Akademi dhe OJQ partnere në të gjithë botën.

Si pjesë e programit, shkollat pjesëmarrëse krijojnë binjakëzim dhe vendosin shkëmbime me shkolla të tjera që janë pjesë e programit, në vende të tjera. SHUKALB ka zbatuar Programin RHAW gjatë vitit aktual akademik në dy shkollat e mesme të Tiranës, “Ismail Qemali” dhe “Qemal Stafa” dhe planifikon ta shtrijë këtë program në më shumë shkolla në të gjithë vendin, gjithashtu me mbështetjen e shoqërive ujësjellës kanalizime anëtare.

Në Ditën Botërore të Ujit, 22 Mars 2022, si fazë finale e programit, u organizua virtualisht eventi vjetor ndërkombëtar i diplomimit, ku 65 shkollat pjesëmarrëse në të gjithë botën, prezantuan projektet e tyre shkencore lidhur me ujin. Shkollat nga Izraeli, Ukraina, Rumania, Moldavia, Lituania, Polonia, Kosova, Shqipëria dhe SHBA bashkëpunuan në lidhje me çështjet e ujit dhe mjedisit, duke paraqitur postera dhe video gjatë një webinari të drejtpërdrejtë. Shqipëria u prezantua nga dy shkollat e mesme të Tiranës, “Ismail Qemali” dhe “Qemal Stafa”.

Shkolla e mesme “Ismail Qemali” paraqiti projektin HYDROPURE i cili u prezantua nga nxënësit Alisia Naska, Anja Xifaj, Shendi Çollaku, Uendi Loka, Xhoana Pepa dhe në bashkëpunim me Desara Mehmeti, Ediona Beqa, Era Alimemeti, Najra Hoxha, Sonja Petro dhe Orjana. Madani.

Nxënësit u ndihmuan nga mësueset: Rezarta Alla, Ermira Milori, Aurela Bixha, Jonida Varfi, Loreta Muca, Jonida Behluli, Loreta Shehu, Silvi Grori.

Shkolla e mesme “Qemal Stafa” paraqiti projektin RECYCLING GREYWATER (Riciklimi i ujit gri) të prezantuar nga nxënësit Ana Kellici, Egnald Çela dhe Alkid Shuli dhe në bashkëpunim me Perla Koka, Megi Boba, Marsida Xhyra, Luntina Shkreta, Desira Meshaj, Kejda Miftari dhe Flavina Zefi.

Nxënësit u ndihmuan nga mësueset: Klotilda Jaupi, Luljeta Gjergo, Neviana Kosova, Xhensila Duzha, Orkida Kosta, Mimoza Taga, Donika Curraj, Liljana Halluni, Refide Xhafkollari, Valentina Lamaj.

Projektet e përgatitura nga nxënësit nga Shqipëria ishin shumë mbresëlënëse dhe nxënësit bënë një prezantim shumë profesional të punës së tyre në gjuhën angleze, pasi ky është një program ndërkombëtar. SHUKALB beson fort në edukimin e brezit të ri, si një faktor i rëndësishëm jo vetëm për të parë një ndryshim pozitiv në sjelljen e klientëve ndaj ujit dhe shërbimeve të ujit, por edhe për inkurajimin e brezit të ri për të kërkuar një karrierë në temat e ujit dhe mjedisit. I inkurajuar nga rezultatet e vitit të dytë të Programit RHAW, SHUKALB pret të ofrojë mundësinë për përfshirjen në program të më shumë shkollave në qytete të ndryshme anembanë vendit, gjatë vitit të ardhshëm akademik.