SHUKALB finalizon me sukses ofrimin e programit të RCDN-së të zhvillimit të kapaciteteve “Hyrje në sistemet e kanalizimeve dhe trajtimit të ujërave të ndotur për menaxherët dhe inxhinierët”

SHUKALB finalizon me sukses ofrimin e programit të RCDN-së të zhvillimit të kapaciteteve “Hyrje në sistemet e kanalizimeve dhe trajtimit të ujërave të ndotur për menaxherët dhe inxhinierët”

Gjatë muajit dhjetorit 2022, SHUKALB zhvilloi me sukses trajnimin 2-ditor me temë “Menaxhimi i Projekteve Infrastrukturore” dhe Shkëmbimin mes kolegëve 1-ditor mbi Projektet e Suksesshme në Infrastrukturën e Kanalizimeve dhe Trajtimit të Ujërave të Ndotura: Rasti Studimor i Projektit të Kanalizimeve dhe Trajtimit të Ujërave të Ndotura në Velipojë. Të dy eventet u zhvilluan në kuadër të programit të zhvillimit të kapaciteteve me temë “Hyrje në sistemet e kanalizimeve dhe trajtimit të ujërave të ndotur për menaxherët dhe inxhinierët”, i cili u pilotua për herë të parë në kuadër të projektit Rrjeti Rajonal i Zhvillimit të Kapaciteteve (RCDN) për furnizimin me ujë dhe kanalizimet.

Trajnimi 2-ditor, “Menaxhimi i Projekteve Infrastrukturore” u organizua në datat 05-06 dhjetor 2022, në Tiranë. Në trajnim morën pjesë përfaqësues nga Shoqëritë UK Vlorë, Shkodër, Lezhë, Kamëz, Fier dhe Himarë, si dhe Bashkitë Vlorë dhe Lezhë. Trajnimi u drejtua nga Evis Gjebrea, Zv/ Drejtor i Përgjithshëm i Shoqërisë Ujësjellës Kanalizime Tiranë dhe Jovan Gjika, Koordinator Projektesh, Agjencia Kombëtare e Ujësjellës-Kanalizimeve dhe Infrastrukturës së Mbetjeve.

Objektivi i përgjithshëm i trajnimit ishte që pjesëmarrësit të thellonin njohuritë e tyre në aspektet e projekteve për grumbullimin dhe trajtimin e ujërave të ndotura dhe t’i analizonin këto projekte dhe të merrninin vendimet përkatëse.

Gjatë 2 ditëve të trajnimit pjesëmarrësit u njohën me tema të tilla si Cikli i Projekteve të Infrastrukturës së Grumbullimit dhe Trajtimit të Ujëra të Ndotura, Fazat e Ciklit të Projektit, Studimi i Fizibilitetit dhe Plani i Menaxhimit të Ujërave të Ndotura, si dhe u angazhuan në disa ushtrime në grupe.

Të nesërmen, më 7 dhjetor 2022, pjesëmarrësit morën pjesë në shkëmbimin mes kolegëve mbi Projektet e Suksesshme në Infrastrukturën e Kanalizimeve dhe Trajtimit të Ujërave të Ndotura në Shqipëri: Rasti Studimor i Velipojës. Shkëmbimi mes kolegëve u moderua nga Kristina Kreka, Drejtuese e Njësisë së Integrimit Evropian, Projektet Strategjike dhe Ndihma e Huaja, Bashkia e Elbasanit dhe Blerina Arrtunda, Menaxhere e ITUN Velipojë & Shirokë, Shoqëria UK Shkodër.

Objektivi i përgjithshëm i shkëmbimit mes kolegëve ishte që pjesëmarrësit të ishin në gjendje të shtonin njohuritë e tyre mbi zbatimin e projekteve të infrastrukturës së kanalizimeve dhe trajtimit të ujërave të ndotur dhe të shkëmbenin përvojat e tyre mbi projektet infrastrukturore KUN në Bashkitë dhe Shoqëritë e tyre.

Pjesëmarrësit zhvilluan një vizitë në Impiantin e Trajtimit të Ujërave të Ndotura (ITUN) në Velipojë ku u njohën me proceset teknologjike të impiantit dhe përgatitjen dhe zbatimin e Projektit Infrastrukturor për Trajtimin e Ujërave të Ndotura në Velipojë. Pas vizitës, shkëmbimi mes kolegëve vazhdoi në Tiranë, ku pjesëmarrësit u njohën me tema si Faza e Përgatitjes dhe Zbatimit të Projekteve në Infrastrukturën KUN; Praktika e Suksesshme e Zbatimit të Projektit të Infrastrukturës së Kanalizimeve dhe të Trajtimit të Ujërave të Ndotura në Velipojë dhe Hartimi i Planit të Veprimit. Përveç kësaj, pjesëmarrësit u angazhuan në diskutime interaktive mbi praktikat e mira dhe shkëmbyen përvojat e tyre mbi Projektet Infrastrukturore KUN.