Konferenca “Aquainnovate Kosovo: Profesionistët e Rinj Formësojnë të Ardhmen e Ujit”, një Risi mbresëlënëse nga PRU Kosova

Një Konferencë shumë profesionale u organizua për herë të parë nga grupi i Profesionistëve të Rinj të Ujit të Kosovës, më 17 janar 2024, në kryeqytetin e Kosovës, Prishtinë. E titulluar “Aquainnovate Kosovo: Profesionistët e Rinj Formësojnë të Ardhmen e Ujit”,  konferenca mblodhi mbi 50 profesionistë të sektorit të ujit nga Kosova, Shqipëria, Maqedonia e Veriut, Republika Çeke, Afrika e Jugut dhe Austria.

Konferenca ofroi një platformë për të diskutuar dhe prezantuar mundësitë e ardhshme dhe inovative për të rinjtë për të përmirësuar sektorin e ujit dhe kanalizimeve. Temat e trajtuara gjatë tre sesioneve të konferencës përfshinin Qasjen e profesionistëve të rinj në menaxhimin e integruar të burimeve ujore; Metodat inovative që transformojnë të ardhmen e sektorit të ujërave në Kosovë, dhe Njohuritë dhe qasjet inovative për mbrojtjen e resurseve ujore në nivel ndërkombëtar/rajonal.

Fjalimet përshëndetëse të konferencës u mbajtën nga Laurent Torche, Zv. Drejtor në Zyrën Zvicerane për Bashkëpunim dhe Abdullah Derguti, Drejtor Ekzekutiv në SHUKOS. Fjalimi kryesor u mbajt nga Dimitrija Sekovski, Udhëheqës i Ekipit të Programit të Menaxhimit të Integruar të Burimeve Ujore në Kosovë (IWRM-K), i cili theksoi rolin jetik të bashkëpunimit dhe angazhimit të PRU Kosova në avancimin e zhvillimit të sektorit të ujit.

Grupi Profesionistëve të Rinj të Ujit të Shqipërisë, i riaktivizuar së fundmi, u përfaqësua në konferencë nga Elsa Belba, Specialiste në Agjencinë Kombëtare të Ujësjellës Kanalizimeve të Shqipërisë (AKUK), e cila ishte e ftuar si paneliste në sesionin e 3-të, me temë “Njohuritë dhe qasjet inovative për mbrojtjen e resurseve ujore në nivel ndërkombëtar/rajonal”.

Sesioni i tretë u karakterizua për përbërjen e tij ndërkombëtare, duke sjellë para audiencës praktikat më të mira nga Republika Çeke, Afrika e Jugut dhe Austria. Gjatë gjithë këtij sesioni, pjesëmarrësit u thelluan në sfidat dhe vështirësitë e aktivizmit rinor në sektorin e ujit, duke nxjerrë njohuri nga përvojat në Maqedoninë e Veriut dhe Shqipëri. Gjithashtu, diskutimi preku qasjet dhe mundësitë e prezantuara nga institucione si Kompanitë Rajonale të Ujit dhe IAWD në lidhje me nismat rinore. Çështjet kryesore nga ky sesion nënvizuan se profesionistët e rinj luajnë një rol kyç si katalizatorë si për shoqërinë ashtu edhe për sektorin e ujit.

Gjatë fjalës së saj, znj. Belba ndau me audiencën historinë e grupit të PRU në Shqipëri, aktivitetet dhe planet e tij aktuale, rolin e tij në adresimin e sfidave kryesore të sektorit të ujit në shkallë lokale dhe globale, ndër të cilat ndryshimet klimatike, së bashku me disa zgjidhje inovative në mbrojtjen e burimeve ujore.