Miratohet Akti Normativ dhe Rregullorja Teknike mbi Standartet për trajtimin e ujërave të ndotur: Pritet përmirësim thelbësor në pastërtinë e deteve, lumenjve dhe liqeneve në të gjithë Shqipërinë

Në datë 28 dhjetor 2023, Këshilli i Ministrave të Shqipërisë miratoi Aktin Normativ nr. 8, “Për marrjen e masave urgjente, për mbrojtjen dhe përmirësimin e infrastrukturës, për trajtimin e ujërave të ndotura që shkarkohen pranë ose në ujëra larëse”.

Akti normativ ka për qëllim trajtimin e ujërave të ndotura nëpërmjet vendosjes së impiantit apo sistemit të grumbullimit, trajtimit dhe largimit të ujërave të ndotura nga ana e subjekteve, të cilat kryejnë veprimtari ekonomike në zonat bregdetare dhe bregun e liqeneve e të lumenjve, të cilat nuk i trajtojnë ujërat e ndotura, të krijuara nga veprimtaria e tyre ekonomike, dhe i shkarkojnë ato pranë ose në ujëra larëse.

Në vazhdim, me datë 1 shkurt 2024, Ministria e Infrastrukturës dhe Energjisë dhe Ministria e Turizmit dhe Mjedisit, nënshkruan udhëzimin e përbashkët “Për miratimin e Rregullores Teknike mbi Standardet për trajtimin e ujërave të ndotur për subjektet që shkarkojnë ujëra të ndotur dhe të patrajtuara pranë ose në ujëra larës”, i cili synon përcaktimin e standardeve teknike në bazë të Aktit Normativ nr. 8.

Rregullorja Teknike bën të mundur orientimin e subjekteve që ushtrojnë veprimtari ekonomike, në zonat bregdetare dhe bregun e liqeneve e të lumenjve apo janë në proces ndërtimi ose kanë aplikuar për leje ndërtimi, në bazë të kapacitetit dhe zgjidhjeve teknike ekzistuese të instalojnë impiante të trajtimit të ujërave të ndotura.

Të gjitha subjektet kanë detyrimin që brenda 90 (nëntëdhjetë) ditëve nga hyrja në fuqi aktit normativ, të vendosin impiantin ose sisteme individuale, me qëllim trajtimin e ujërave të ndotura, sipas rregullores teknike.

Agjencia Kombëtare e Ujësjellës-Kanalizimeve (AKUK) është ngarkuar me detyrën e ngritjes së një Task-Force, për monitorimin, inspektimin dhe marrjen e masave, në zbatim të aktit normativ, me qëllim rregullimin e pasojave që vijnë nga mostrajtimi i ujërave të ndotura që shkarkohen pranë ose në ujëra larëse në zonat bregdetare, ose në bregun e liqeneve e të lumenjve.

Dokumentat e plotë mund t’i shkarkoni duke klikuar në linqet mëposhtë:

• Akti Normativ nr. 8, datë 28.12.2023
• Rregullorja Teknike