Takimi i Validimit dhe Koordinimit me Palët e Interesit në Vlerësimin e Nevojave për Trajnim të Shoqërive Ujësjellës Kanalizime në Shqipëri

Më 23 Shkurt 2024, SHUKALB organizoi me sukses takimin për Validimit dhe Koordinimit me Palët e Interesit në Vlerësimin e Nevojave për Trajnim të Shoqërive Ujësjellës Kanalizime në Shqipëri. Takimi u zhvillua në Tiranë me prezencë fizike si dhe me pjesëmarrje online nëpërmjet zoom.

Në takim morën pjesë 30 pjesëmarrës, që përfaqësonin shoqëritë ujësjellës kanalizime, Agjencinë Kombëtare Ujësjellës-Kanalizime (AKUK), Entin Rregullator të Ujit Shqiptar (ERRU), Bankën Botërore, GIZ, Fondin Shqiptar të Zhvillimit dhe trajnerë të rrjetit të SHUKALB. Takimi u moderua nga Elisabeta Poci, Drejtore Ekzekutive e SHUKALB dhe Jonida Ahmeti, Menaxhere e Trajnimit dhe Zhvillimit Profesional të SHUKALB.

Takimi u organizua në kuadër të projektit “Rrjeti Rajonal i Zhvillimit të Kapaciteteve për Furnizimin me Ujë dhe Kanalizimet (RCDN+)” dhe kishte për qëllim lehtësimin e shkëmbimit të informacionit, validimin dhe planifikimin bashkëpunues për zhvillimin e kapaciteteve të Shoqërive Ujësjellës Kanalizime, dhe nxitjen e një koordinimi midis palëve të ndryshme të interesit me një fokus të veçantë në zbatimin efektiv të aktiviteteve të zhvillimit të kapaciteteve brenda sektorit të ujit.

Pjesëmarrësit u prezantuan me një raport të hollësishëm të nxjerrë nga anketa e Vlerësimit të Nevojave për Trajnim (VNT), e kryer nga SHUKALB në fillim të këtij viti, i cili theksoi fushat kyçe problematike dhe nevojat prioritare të trajnimit të identifikuara midis shoqërive ujësjellës kanalizime në Shqipëri. . Pjesëmarrësit u angazhuan në diskutime të hapura në lidhje me rezultatet e VNT-së, ku dhanë komente të vlefshme dhe pikëpamjet e tyre për nevojat e identifikuara për trajnim, si dhe rekomandime për përfshirjen e treguesve shtesë në anketë për të pasur një pasqyrë më të plotë të nevojave për trajnim.

Pas rezultateve të diskutimeve dhe komenteve të marra gjatë takimit, SHUKALB do të përgatisë kalendarin e tij të trajnimeve për vitin 2024.