Nga Drejtësia te Uji: Një intervistë kuptimplotë me Fatjon Turmetaj, Përgjegjës i Sektorit të Prokurimeve në Shoqërinë Rajonale Ujësjellës Kanalizime Shkodër

Në këtë botim të Burimi-t, ju sjellim një intervistë ndriçuese me Fatjon Turmetaj, Përgjegjës i Sektorit të Prokurimeve në Shoqërinë Rajonale Ujësjellës Kanalizime Shkodër. Z. Turmetaj flet për pasionin e tij për drejtësinë, rrugëtimin e tij në sektorin e ujit dhe sfidat dinamike me të cilat përballet çdo ditë.

Çfarë ju tërheq më shumë në profesionin qe keni zgjedhur?

Drejtësia! Unë karakterizohem si person që më pëlqen drejtësia në përgjithësi dhe duke bërë zgjedhjen e profesionit, vendosa që ti përkushtohem edhe profesionalisht pikërisht drejtësisë, me synimin që të kontribuoj sado pak në përmirësimin e sistemit të drejtësisë shqiptare. Vendosa që ti përkushtohem profesionit të juristit në administratën publike ,duke dhënë kontributin tim në zbatimin me përgjegjësi të plotë të ligjit dhe procedurave administrative.

Sa vite keni që punoni në sektorin e ujit?

Të them të vertetën, karriera ime profesionale lidhet ngushtësisht me sektorin e ujit. Fillimisht, pas mbarimit të shkollës në vitin 2009 , fillova punë pranë Bordit të Kullimit Shkodër, ku kam shërbyer si jurist i ndërmarrjes për 6 vite. Normalisht, aty u përballa me sfidat e para profesionale dhe me shumë përkushtim dhe këmbëngulje arrita të përvetësoj punën dhe të rritem profesionalisht.

Në vitin 2015 mora ofertën për të marrë përsipër pozicionin e Drejtorit Administrativo- Ligjor me 5 sektor në varësi (Sektori Juridik dhe i Prokurimeve, Sektori i Burimeve Njerëzore, Sektori i Task-Forcës Sektori i IT dhe Sektori i Shërbimeve Mbështetëse ). Në këtë pozicion kam shërbyer për 8 vite deri në rajonalizimin e Ujësjellës- Kanalizime Shkodër. Aktualisht mbuloj Sektorin e Prokurimeve.

Çfarë ju pëlqen më shumë në punën tuaj?

Ajo që unë vlerësoj më shumë në punën time është padyshim përvoja. Çdo ditë është një sfidë e re!

Ndryshimet e vazhdueshme ligjore dhe evoluimi i sistemit të teknologjisë, e bëjnë punën akoma më sfiduese por në të njëjtën kohë, edhe më dinamike, motivuese, më stimuluese, më pak monotone pasi vazhdimisht duhet të pershtatemi me inovacionet.  Në Shoqërinë Ujësjellës- Kanalizime Shkodër, tashmë rajonale, kam gjetur një staf të perkushtuar dhe shumë miqësor, të gatshëm për të bashkëpunuar. Dhe më e rëndësishmja, që nga dita e parë, kam patur mbështetjen e të gjithë ekipit tim të bashkëpunëtorëve.

Çfarë mesazhi doni ti jepni, të rinjve, brezit të ri që dëshiron të punoje në sektorin e ujit?

Unë kam një parim: Nëse ju e doni punën që bëni, nuk do të lodheni asnjëherë, pasi kur bëjmë punën që duam, jemi më të motivuar dhe mund të japim maksimumin e aftësive tona.

Rrugëtimi dhe njohuritë e Fatjon Turmetajt ofrojnë mësime të vlefshme për këdo që mendon për një karrierë në sektorin e ujit. Përkushtimi i tij ndaj drejtësisë dhe rritjes së vazhdueshme profesionale ilustron cilësitë që nxisin suksesin në këtë fushë.