SHUKALB merr pjesë në Programin e D-LeaP të Trajnimit të Trajnerëve për Planifikimin e Sigurisë së Ujit dhe Menaxhimin e Krizave

Nga data 17 deri më 21 mars 2025, SHUKALB mori pjesë në Trajnimin e Trajnerëve (ToT) për Programin e Partneritetit te Danubit (D-LeaP) Plani i Sigurisë së Ujit dhe Menaxhimi i Krizave, të organizuar nga Shoqata Ndërkombëtare e Kompanive të Shërbimeve të Ujit në Rajonin e Danubit (IAWD). Trajnimi u zhvillua në ambientet e Bankës Botërore në Vjenë, Austri, dhe kishte për qëllim forcimin e aftësive të trajnerëve për të udhëhequr shoqëritë ujësjellës-kanalizime në zhvillimin e strategjive efektive të menaxhimit të krizave dhe Planëve të Sigurisë së Ujit (PSU).

Përfaqësues nga SHUKALB ishin Olta Alla, Menaxhere e Programeve dhe Koordinatore e Trajnimeve dhe Etleva Demiri, Përgjegjëse e Sektorit Teknik dhe Licencimit pranë Entin Rregullator të Ujit. Atyre iu bashkuan trajnerë nga Shoqata Bullgare e Ujit.

Objektivi i ToT ishte të pajiste me njohuri të thelluara për identifikimin e rreziqeve në sistemet e furnizimit me ujë, krijimin e strukturave organizative të menaxhimit të krizave brenda shoqërive ujësjellës kanalizime dhe përcaktimin e roleve të menaxhimit strategjik dhe operacional gjatë krizave. Trajnimi u fokusua gjithashtu në aspektet procedurale të menaxhimit të krizave dhe zhvillimin e Planeve të Sigurisë së Ujit për të përmirësuar qëndrueshmërinë e shoqërive ujësjellës kanalizime.

Axhenda e ToT përfshinte sesione gjithëpërfshirëse mbi menaxhimin e rrezikut, manuale për menaxhimin e krizave dhe trajnime praktike për menaxhimin e krizave. Aktiviteti u drejtua nga Christian Plohberger, me mbështetjen e Deshire Kurtaj, nga Protectum Solutions.

Kjo ToT është pjesë e përpjekjeve të vazhdueshme të IAWD përmes D-LeaP për të mbështetur dhe forcuar shoqatat kombëtare të ujit në ofrimin e programeve të zhvillimit të kapaciteteve me cilësi të lartë për shoqëritë e tyre ujësjellës kanalizime, në gjuhën e tyre lokale. SHUKALB ka planifikuar të ofrojë edhe këtë vit programin e D-LeaP Plani i Sigurisë së Ujit për shoqëritë ujësjellës kanalizime të interesuara.