Në shërbim të qytetarëve prej katër dekadash – Portreti i Hyqmet Rucit, një profesionist i përkushtuar në sektorin e ujit në Berat

Hyqmet Ruci, i lindur më 20 shtator 1964, është një nga emrat më të respektuar në Shoqërinë Rajonale Ujësjellës-Kanalizime Berat. Prej më shumë se 40 vitesh, ai është i lidhur ngushtë me sistemin e furnizimit me ujë në qytet dhe sot mban rolin e përgjegjësit në sektorin e grumbullimit dhe shpërndarjes së ujit në Njësinë Berat.

Sa vite keni që punoni në sektorin e ujit?

“Kam filluar punë në shtator të vitit 1984, pranë ish-ndërmarrjes elektro-ujësjellës. Që nga ajo kohë, jam pjesë e pandërprerë e këtij sektori, duke kontribuar prej 40 vitesh në furnizimin dhe shpërndarjen e ujit në qytetin tim.”

Çfarë ju pëlqen më tepër në profesionin tuaj?

“Kënaqësia më e madhe në këtë profesion është kur sheh që puna jote ka vlerë. Kur qytetarët të falënderojnë për ndihmën, kur ndihen të dëgjuar e të mbështetur, ajo fjalë e mirë që del prej tyre të mbush me krenari dhe të motivon të vazhdosh me përkushtim.”

Cilat janë sfidat më të mëdha në punën tuaj?

“Sfida ime më e madhe është të siguroj furnizim me ujë për qytetarët, pikërisht në momentet kur ky furnizim mungon. Duhet të reagosh shpejt, të gjesh zgjidhje në kohë optimale dhe të shmangësh çdo pasojë që mund të rëndojë mbi komunitetin.”

Na përshkruani ditën tuaj të punës?

“Dita ime nis me komunikim të drejtpërdrejtë me stafin për të analizuar problematikat e ditës së mëparshme. Më pas vijoj me raportimin tek zyra teknike dhe ndjekjen e çdo ankese apo shqetësimi nga qytetarët, derisa të zgjidhet plotësisht.”

Çfarë mesazhi doni t’i jepni brezit të ri që dëshiron të punojë në sektorin e ujit?

“Vetëm me punë të ndershme dhe përballimin e vështirësive mund të rritesh profesionalisht dhe të bëhesh dikush në jetë. Kjo është një fushë që kërkon përkushtim të vazhdueshëm, por jep edhe shumë kënaqësi kur e bën me zemër.”