SHUKALB përmbyll me sukses Modulin 3 dhe Shkëmbimin e Eksperiencës të Programit të Zhvillimit të Kapaciteteve për Ujërat e Ndotura

Në datat 1 – 3 Tetor 2025, në Pejë, Kosovë, SHUKALB zhvilloi me sukses Modulin 3: Aspektet Lidhur me Projektet dhe Shkëmbimin e Eksperiencës – Rast Studimor i Impiantit të Trajtimit të Ujit të Ndotur në Pejë, pjesë e programit “Hyrje në teknologjitë e grumbullimit dhe trajtimit të ujërave të ndotura”, në kuadër të projektit Rrjeti Rajonal i Zhvillimit të Kapaciteteve (RCDN).

Ky modul përmbyll ciklin e trajnimeve të programit shumëditor për zhvillimin e kapaciteteve, pas Modulit I, që trajtoi aspektet rregullatore dhe financiare, dhe Modulit II, i fokusuar në teknologjitë e trajtimit të ujërave të ndotura.

Në këtë trajnim morën pjesë përfaqësues të stafit teknik dhe menaxherial nga shoqëritë ujësjellës kanalizime Berat, Gjirokastër, Korçë, Elbasan dhe Durrës, si dhe përfaqësues nga Enti Rregullator i Ujit (ERRU) dhe Agjencia Kombëtare e Ujësjellës-Kanalizimeve (AKUK).

Gjatë trajnimit, pjesëmarrësit patën mundësinë të thellojnë njohuritë e tyre mbi:

• Ciklin e jetës së projekteve infrastrukturore
• Interpretimin e studimeve të fizibilitetit për sistemet e trajtimit të ujërave të ndotura
• Çështjet kyçe të impjanteve dhe cilësisë së ujërave të trajtuara

Programi tre-ditor u zhvillua përmes prezantimeve interaktive, punës në grup, lojërave edukative dhe një vizite praktike në Impiantin e Trajtimit të Ujit të Ndotur (ITUN) në Pejë, ku pjesëmarrësit analizuan nga afër fazat e projektimit, zbatimit dhe operimit të projekteve reale të trajtimit të ujërave të ndotura.

Ky format trajnimi u vlerësua për qasen praktike dhe ndërvepruese, duke nxitur shkëmbimin e eksperiencave ndërmjet profesionistëve të sektorit dhe duke forcuar bashkëpunimin ndërinstitucional mes Shqipërisë dhe Kosovës.

Trajnimi u udhëhoq nga një ekip ekspertësh të fushës: Prof. Enkelejda Gjinali (Universiteti Politeknik i Tiranës), Evis Gjebrea (Ujësjellës Kanalizime Tiranë), Jovan Gjika (Agjencia Kombëtare e Ujësjellës-Kanalizimeve), dhe Dukagjin Nishiqi (KRU Hidrodrini, Pejë).

Në përfundim të programit, pjesëmarrësit ndanë reflektime mbi njohuritë e fituara dhe mënyrat për t’i aplikuar ato në përmirësimin e planifikimit dhe menaxhimit të projekteve të ujërave të ndotura në rajon.

SHUKALB falënderon trajnerët dhe pjesëmarrësit për angazhimin dhe kontributin e tyre gjatë këtij programi gjithëpërfshirës, i cili synon të forcojë kapacitetet profesionale dhe të nxisë zbatimin e praktikave të qëndrueshme në sektorin e ujit dhe kanalizimeve.