SHUKALB përfundon me sukses Trajnimin 3-ditor të Përgjithshëm të Trajnerëve në kuadër të projektit RCDN+

Nga data 10–12 shtator 2025, në ambientet e Hotel Hilton Garden Inn, Tiranë, SHUKALB zhvilloi me sukses Trajnimin 3-ditor të Përgjithshëm të Trajnerëve, organizuar në kuadër të projektit RCDN+ (Rrjeti Rajonal i Zhvillimit të Kapaciteteve).

Ky trajnim kishte si qëllim forcimin e kompetencave metodologjike të profesionistëve të sektorit të ujit për ofrimin e trajnimeve me cilësi të lartë, në përputhje me Standardet e Cilësisë RCDN.

Gjatë tre ditëve të programit, trajnerë nga Pool-i i Trajnerëve të SHUKALB, si dhe përfaqësues të shoqërive ujësjellës-kanalizimeve dhe institucioneve publike, morën pjesë në një seri sesionesh interaktive që kombinonin konceptet teorike me ushtrime praktike.

Trajnimi u drejtua nga Master Trajnerja Evis Gjebrea, PhD, në bashkëpunim me Frosela Filo dhe Olta Alla, të cilave SHUKALB u shpreh mirënjohjen për profesionalizmin dhe përkushtimin e treguar.

Programi përfshiu një gamë të gjerë temash, ndër to:

• Cikli i Menaxhimit të Trajnimit  dhe Standardet e Cilësisë për Ofrimin e Trajnimeve;
• Dizajni i programeve mësimore dhe aftësitë didaktike për të rritur;
• Teknikat e trajnimit dhe lehtësimit efektiv, duke përfshirë role-playing, prezantime dhe diskutime në grup;
• Menaxhimi i sfidave dhe i pjesëmarrësve të vështirë, si dhe vlerësimi reflektues i performancës së trajnerëve.

Në ditën e fundit, pjesëmarrësit patën mundësinë të praktikonin aftësitë e fituara përmes sesioneve të simuluara të trajnimit, duke marrë feedback nga trajnerët dhe kolegët.

Ky trajnim përbën një hap të rëndësishëm në forcimin e kapaciteteve institucionale dhe profesionale të sektorit të ujit në Shqipëri, si pjesë e angazhimit të SHUKALB për të ofruar trajnime të standardizuara dhe të harmonizuara rajonalisht, sipas qasjes së RCDN+.

Përmes këtyre iniciativave, SHUKALB synon të rrisë cilësinë dhe qëndrueshmërinë e shërbimeve të zhvillimit të kapaciteteve, duke kontribuar drejtpërdrejt në profesionalizimin e mëtejshëm të sektorit të ujësjellës-kanalizimeve në vend.