SHUKALB forcon kapacitetet e profesionistëve të shoqërive ujësjellës kanalizime përmes trajnimit për shërbim të shkëlqyer ndaj klientit

SHUKALB përmbylli  me sukses në Tiranë kursin dyditor të trajnimit “Shërbimi i Klientit dhe Marrëdhëniet me Publikun”, i zhvilluar në datat 24–25 qershor 2026 në Hotel Hilton Garden Inn, me pjesëmarrjen e specialistëve nga Shoqëria Rajonale Ujësjellës Kanalizime Durrës dhe Shoqëria Ujësjellës Kanalizime Tiranë.

Trajnimi u drejtua nga eksperti i sektorit, z. Arjan Gjorga, dhe kishte për qëllim forcimin e njohurive dhe aftësive të stafit në fushën e shërbimit ndaj klientit, komunikimit publik dhe menaxhimit të marrëdhënieve me konsumatorët.

Gjatë dy ditëve të trajnimit, pjesëmarrësit trajtuan në mënyrë të detajuar konceptet dhe praktikat kryesore të shërbimit modern ndaj klientit në sektorin e ujësjellës-kanalizimeve. Diskutimet u fokusuan në themelet e shërbimit të shkëlqyer, organizimin e strukturave të shërbimit ndaj klientit dhe rolin e personelit në rritjen e cilësisë së shërbimit.

Një vëmendje e veçantë iu kushtua komunikimit me publikun dhe menaxhimit të perceptimit të klientit, duke theksuar rëndësinë e çdo ndërveprimi mes shoqërisë dhe qytetarëve në formësimin e imazhit institucional dhe nivelit të kënaqësisë së klientëve.

Pjesëmarrësit u angazhuan gjithashtu në sesione praktike mbi menaxhimin e bazës së të dhënave të klientëve, trajtimin e ankesave dhe përdorimin e informacionit si mjet për të përmirësuar ofrimin e shërbimeve dhe për të forcuar besueshmërinë ndaj shoqërive ujësjellës-kanalizime. Po ashtu, u trajtuan çështje të rëndësishme si leximi i matësve, proceset e faturimit dhe arkëtimit, si dhe menaxhimi i ndërprerjeve dhe shkëputjeve nga rrjeti i furnizimit.

Gjatë ditës së dytë, u theksua gjithashtu rëndësia e hartimit të planeve efektive të komunikimit dhe integrimit të formave të ndryshme të medias në strategjitë e komunikimit institucional, me qëllim përmirësimin e marrëdhënieve me publikun dhe rritjen e transparencës.

Trajnimi u përmbyll me ndarjen e certifikatave të pjesëmarrjes dhe vlerësime për angazhimin e treguar nga pjesëmarrësit gjatë gjithë programit. SHUKALB ritheksoi angazhimin e saj për të mbështetur zhvillimin profesional të stafit të shoqërive ujësjellës-kanalizime dhe për të promovuar praktikat më të mira në shërbimin ndaj klientit, duke kontribuar në përmirësimin e performancës së sektorit dhe forcimin e marrëdhënieve me konsumatorët.